अनि चाहे तपाईं छुट्काराको सेवकाइ गरिरहनुभएको होस्, बिरामीहरूका लागि प्रार्थना गरिरहनुभएको होस् वा आफ्नै जीवनमा शैतानविरुद्ध स्थान लिइरहनुभएको होस्, तपाईंले यस कुरामा सदैव ध्यान राख्नुहोस्– शैतान पराजित शत्रु हो । यदि तपाईं विश्वासी हुनुहुन्छ भने, तपाईं अहिले ख्रीष्टसँगै स्वर्गीय स्थानमा विराजमान हुनुहुन्छ । शैतानमाथिको प्रभु येशूको विजय तपाईंको विजय हो किनभने तपाईं उहाँमा हुनुहुन्छ ।
अन्धकारको अधिकार कहाँ लुकेको छ ? शैतानमा ! तर हामी शैतानको अधिकारबाट छुटाइएका छौँ ! अनि हामीले यो जान्नु आवश्यक छ कि शैतान पराजित वा आफ्नो अधिकारबाट च्युत गरिएको शत्रु हो !
त्यसैकारण म शैतानविरुद्ध लडाइँ गर्नेछैनँ । म त केवल त्यसमाथि आफ्नो अधिकार प्रयोग गर्नेछु र त्यसलाई उसकै स्थानमा सीमित गरिदिनेछु किनभने म जयवन्त मण्डलीको एक हिस्सा हुँ !
तपाईं एकछिन यसरी सोच्नुहोस् न— कुनै पनि कुराले तपाईंको शिरमाथि अधिकार नजमाई तपाईंको शरीरमा मात्र अधिकार जमाउन सक्छ र ? सक्दैन नि । जे तपाईंको शिरको हो, त्यो तपाईंको शरीरको पनि हो ।
मण्डलीको शिर प्रभु येशू ख्रीष्ट भूत आत्मा, दुष्ट आत्मा तथा स्वयम् शैतानविरुद्ध विजयी हुनुभएकाले हामी पनि उहाँसँगै विजयी भएका छौँ किनभने हामी उहाँका शरीर हौँ । उहाँको विजय हाम्रो विजय हो ! त्यसैले हामीले आफूलाई जयवन्त मण्डली भन्नुपर्छ । अनि हाम्रो यो परिचय अहिले अर्थात् वर्तमान समयको हो, केवल पृथ्वी छाडेर स्वर्ग लगिएपछिको होइन ।
हामी शैतानको अधिकारबाट छुटाइएका छौँ । त्यसकारण कुनै पनि दृष्टिबाट ख्रीष्टको देहमाथि शैतानको अधिकार छैन । पटक्कै छैन, तर ख्रीष्ट येशूमा हामीसँग शैतानमाथि अधिकार छ ! येशूले प्रधानताहरू र शक्तिहरूलाई निःशस्त्र पारी ती सबैमाथि क्रूसमा [येशूको मृत्यु, गडाइ, पुनरुत्थान र महिमित स्वर्ग आरोहण] विजय प्राप्त गर्नुभयो र तिनलाई खुल्लमखुल्ला तमाशा बनाइदिनुभयो !
हो, हामीले दुष्ट आत्माहरूको सामना गर्नुपर्छ तर हामीसँग तिनीहरूमाथिको अधिकार छ । उनीहरू आफ्नो स्थानबाट च्युत गरिएका सामर्थ्यहरू हुन् ! हामी प्रभु येशूले पहिल्यै हाम्रा लागि उपलब्ध गराउनुभएको विजयमा आनन्द मनाउने जयवन्त मण्डली हौँ । हामीले शैतानविरुद्ध युद्ध गर्नु आवश्यक छैन । हामीले केवल त्यसविरुद्ध आफ्नो स्थानमा खडा भएर वचन प्रयोग गरी त्यसलाई भाग्न बाध्य पार्नुपर्छ ।
आफ्नो स्थानबाट च्युत गरिएका ती सामर्थ्यहरूले तपाईंमाथि शासन गर्नुको सट्टा तपाईं तीमाथि शासन गर्नुहोस् ! वास्तवमा, दुष्ट आत्माहरूको सामना गर्दा तपाईंले तिनीहरूलाई आफूभन्दा तल देख्नुभएन भने, तपाईं उनीहरूभन्दा धेरै माथि हुनुहुन्न ! उठ्नुहोस् र ख्रीष्टमा आफूले पाएको स्थान लिनुहोस् ! स्वर्गीय स्थानमा ख्रीष्टसँगै बसेर जयवन्त मण्डली भई शासन गर्नुहोस् ।
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
