मूर्तिहरूसँग परमेश्वरको मन्दिरको के सम्झैता ? किनभने हामी जीवित परमेश्वरका मन्दिर हौं, जसरी परमेश्वरले भन्नुभएको छ, “म तिनीहरूमा वास गर्नेछु, र तिनीहरूका बीचमा हिँड्डुल गर्नेछु, र म तिनीहरूका परमेश्वर हुनेछु, अनि तिनीहरू मेरा प्रजा हुनेछन् ।”
– २ कोरिन्थी ६:१६
यदि तपाईंले नयाँ जन्म पाउनुभएको छ भने, पवित्र आत्मा तपाईंको आत्मामा विराजमान हुनुहुन्छ ।
पवित्र आत्मा कहाँ विराजमान हुनुहुन्छ ? तपाईंको शिरमा ? अहँ, होइन । तपाईंको शरीरमा ? एक दृष्टिले हेर्दा हो तर हामीले सोचेजस्तो तरिकाले भने उहाँ हाम्रो शरीरमा विराजमान हुनुहुन्न । हाम्रो शरीर हाम्रो आत्मा [वास्तविक मानिस] बस्ने घर भएका कारण मात्र हाम्रो शरीर पवित्र आत्माको मन्दिर भएको हो । पवित्र आत्मा हाम्रो आत्मामा बस्नुहुन्छ अनि हाम्रो आत्माद्वारा उहाँ हामीसँग सञ्चार गर्नुहुन्छ ।
पवित्र आत्माले हाम्रो मनसँग सिधै बातचित गर्नुहुन्न । उहाँ हाम्रो मनमा हुनुहुन्न । उहाँ त हाम्रो आत्मामा हुनुहुन्छ र हाम्रो आत्माद्वारा हामीसँग बातचित गर्नुहुन्छ । निश्चय नै, तपाईंको आत्माले भने तपाईंको मानसिकतालाई प्रभाव पार्न सक्छ ।
ख्रीष्टमा नयाँ जन्म पाउँदा म ओछ्यानमा थला परेको थिएँ । तर त्यो आत्मिक बाल्यावस्थाको समयमा पनि म भित्री गवाहीद्वारा परिस्थिति थाहा पाउन सक्थेँ । मलाई पवित्र आत्माको बप्तिस्मा र अन्य भाषामा बोल्ने विषयमा केही पनि थाहा थिएन– यद्यपि, मैले पवित्र आत्माद्वारा नयाँ जन्म पाएको थिएँ । अनि म परमेश्वरको सन्तान हुँ भनी मैले आफ्नो आत्मामा गवाही पाएको थिएँ ।
म ओछ्यानमा थला परेको चार महिना भएको थियो । एक दिन आमा मकहाँ आएर भन्नुभयो, “छोरा, म तिमीलाई तनाब दिन चाहन्नँ तर, हेर न, तिम्रो दाजु डब समस्यामा परेजस्तो छ ।”
मेरी आमाले आफ्नो आत्मामा केही महसुस गर्नुभएको थियो । आमाले डब दाइ समस्यामा परे वा जेल परे होला भनी सोच्नुभएको थियो । उहाँले भन्नुभयो, “डबका लागि तीन दिनदेखि म प्रार्थना गरिरहेकी छु तर म प्रार्थनामा सहायताको जरुरी छ ।”
मैले भनेँ, “आमा, म ओछ्यान परेकाले तपाईं पहिले नै ठूलो समस्यामा हुनुहुन्छ । धेरै दिनदेखि डब दाजुको बारेमा मैले जानेको छु । उहाँ जेलमा हुनुहुन्न । उहाँको समस्या जेलसँग सम्बन्धित छैन । उहाँको शारीरिक जीवन समस्यामा छ तर मैले पहिले नै प्रार्थना गरिसकेको छु । त्यसैले उहाँ सकुशल घर आउनुहुनेछ । मैले प्रार्थनाको जवाफ पाएको छु ।
त्यति बेला मलाई चङ्गाइसम्बन्धी प्रार्थनाको जवाफ कसरी प्राप्त गर्ने थाहा थिएन– अवश्य त्यसको एक वर्षपछि मात्र म निको भएको थिएँ । तर मलाई केही कुरा थाहा थियो । परमेश्वरको स्तुति होस् ! तपाईंले जति विश्वास गर्न सक्नुहुन्छ, परमेश्वरले त्यति नै काम गर्नुहुन्छ ।
तीन दिनपछि डब दाइ घर आए । हेर्नुहोस्, यो १९३३ सालको कुरा हो । त्यति बेला काम पाइँदैनथ्यो । आर्थिक मन्दी भएका कारण मानिसहरू कामको अभावमा यताउति भौँतारिएका हुन्थे । त्यस क्रममा डब दाइ काम खोज्नका लागि रियो ग्रेन्डी उपत्यका गएका थिए । त्यहाँ उनले केही काम पाएनन् । त्यसैले उनले रियो ग्रेन्डी उपत्यकाबाट म्याकिन्नी– जहाँ हाम्रो घर थियो– जानका लागि मालबाहक रेलमा लुकेर चढ्ने निर्णय गरे । त्यति बेला धेरै मानिसहरू रेल चढ्ने गर्थे ।
ड्यालसभन्दा करिब ८० किलोमिटर दक्षिण भेगमा रेलका एक कर्मचारीले उनलाई टाउकामा हिर्काए र करिब १०० कि.मि. प्रतिघण्टा कुदिरहेको रेलबाट बाहिर फ्यालिदिए । दाइ रेलको लिगबाट तलतिर गुडुल्किए । त्यति बेला रेलमा कोइला प्रयोग गरिन्थ्यो अनि रेलका कर्मचारीहरूले भुङ्ग्रोसहितको खरानी लिगको छेउछाऊ फ्याल्थे । दाइको शरीरले त्यो भुङ्ग्रो छोयो अनि हतार हतार ढाडले घस्रँदै पछाडि फर्किए । त्यति हुँदा पनि उनको ढाड नभाँचिनु अचम्मको कुरा हो । यदि हामीले भित्री गवाहीद्वारा थाहा नपाएको भए अनि प्रार्थना नगरेको भए, सायद उनको ढाड नै भाँचिन्थ्यो होला ।
उनी नलीमा नै पल्टिरहे अनि केही समयपछाडि त्यहाँबाट निस्किए । उनको सर्ट अनि प्यान्टको पछाडिको भाग पूरै च्यातिएको थियो । त्यसकारण उनी रातको समयमा मात्र यात्रा गर्न सक्थे । दिनको समयमा उनी खेतबारीका रूखहरूमा लुक्थे । त्यो फलफूल प्रशस्त हुने मौसम थियो । अनि रातको समयमा उनले रेलको लिगलाई पछ्याउँदै म्याकिन्नीको बाटो तय गर्थे । उनी घर पनि रातकै समयमा आइपुगेका थिए । आमाले दाइको ओछ्यान बनाइदिनुभयो । केही दिनमै उनी ठीक भए ।
आमा र म आत्माले भरिएका थिएनौँ– यद्यपि, हामी ख्रीष्टीयन थियौँ । अनि केही न केही खराब भइरहेको छ भनी हामीले आत्मामा गवाही पाएका थियौँ । प्रत्येक विश्वासीसँग यो भित्री गवाही हुनु आवश्यक छ । भित्री गवाही वा आवाजलाई सुन्ने बानीको विकास प्रत्येक विश्वासीले गर्नु आवश्यक छ । हो, हामीले हाम्रो आत्माको विकास गर्नुपर्छ ।
दश वर्षभन्दा कम समय अवधिमा मेरा एक पूर्ण सुसमाचारीय सम्प्रदायका साथी तीन वटा गम्भीर सवारी दुर्घटनामा परे । ती दुर्घटनाहरूमा धेरै मानिसहरूको मृत्यु भयो । मेरा एक मित्रकी श्रीमती मृत्युको मुखमा पुगेर बाँचिन् । मेरा साथी पनि गम्भीर घाइते भएका थिए । गाडी पूर्ण रूपमा ध्वस्त भएको थियो तर परमेश्वरको कृपाले ती दुवै जना ठीक भए ।
यस विषयमा मैले दिएको शिक्षा उनले सुने अनि मलाई भने, “हेगन दाजु, यदि मैले त्यो भित्री आवाजलाई सुनेको भए, ती दुर्घटनाहरू हुने नै थिएनन् ।”
यद्यपि, त्यस्ता प्रकृतिका अन्य अवस्थाहरूमा मानिसहरू भन्ने गर्छन्, “त्यस्तो असल विश्वासीको जीवनमा किन त्यस्तो अशुभ भएको होला ! उनी त प्रचारक थिए ।” [जसरी तपाईंले आफ्नो आत्माको आवाज सुन्नुपर्छ, त्यसरी नै प्रचारकहरूले पनि आफ्नो आत्माको आवाज सुन्नु आवश्यक छ ।] अनि उनीहरूले यो कुरा परमेश्वरको पोल्टामा हाल्दिन्छन् र परमेश्वर नै त्यो प्रचारकको मृत्युको कारण हुनुहुन्छ भनी ठान्छन् ।
ती प्रचारकले मलाई भने, “यदि मैले आफूभित्रबाट आएको आज्ञालाई सुनेको भए, मैले थप केही समय प्रतीक्षा तथा प्रार्थना गर्थें । कुनै घटना हुन गइरहेको छ भनेर आफूभित्रबाट आवाज आए पनि मैले त्यसलाई ध्यान दिइनँ, बरू उल्टै यस्तो सोचेँ, ‘म त व्यस्त छु । मसँग प्रार्थना गर्ने समय छैन ।’”
धेरै पटक यदि हामीले प्रतीक्षा गरेको भए, परमेश्वरले हामीलाई देखाउनुहुन्थ्यो । हामी धेरै खराब परिस्थितिबाट बच्न सक्थ्यौँ तर अब बितेका कुराहरूका लागि बिलौना नगरौँ । आउनुहोस्, हामीसँग भएका कुराहरूको लाभ उठाऔँ र हिजोका दिनमा भएका गल्तीहरू फेरि हुन नदिऔँ । आखिर हामीले विगतलाई परिर्वतन गर्नसक्ने होइनौँ क्यारे । आउनुहोस् , आफ्नो आत्माको विकास गर्नतर्फ लागौँ अनि आत्माको आवाज सुन्न सिकौँ ।
पवित्र आत्मा तपाईंको आत्मामा विराजमान हुनुहुन्छ । तपाईंको आत्माले पवित्र आत्माबाट यी ज्ञान तथा विवेक पवित्र आत्माबाट प्राप्त गर्छ अनि भित्री गवाही तथा भित्री आवाजका रूपमा हाम्रो मनलाई अगुवाइ गर्छ ।
प्रभु येशूले भन्नुभयो, “जसले मलाई प्रेम गर्छ, त्यसले मेरो वचन पालन गर्नेछ, र मेरा पिताले त्यसलाई प्रेम गनुहुनेछ, र हामी त्यसकहाँ आउनेछौं, र त्यससँग वास गर्नेछौं” (यूहन्ना १४:२३) । वचनको यो खण्डमा प्रभु येशूले पवित्र आत्माको आगमनका बारेमा कुरा गरिरहनुभएको छ । पवित्र आत्माको रूपमा प्रभु येशू र परमेश्वर पिता हामीभित्र वास गर्न आउनुहुन्छ । निवास वा घर भनेको त्यो स्थान हो, जहाँ कोही व्यक्ति बस्छ । एउटा अङ्ग्रेजी अनुवादले भनेको छ, “हामी त्यस व्यक्तिकहाँ आउनेछौँ र त्यसलाई हाम्रो घर बनाउनेछौँ ।”
प्रेरित पावलद्वारा पवित्र आत्माले भन्नुभयो, “के तिमीहरूलाई थाहा छैन, तिमीहरू परमेश्वरका मन्दिर हौ, र परमेश्वरका पवित्र आत्मा तिमीहरूमा वास गर्नुहुन्छ ?” (१ कोरिन्थी ३:१६) । एउटा अङ्ग्रेजी अनुवादले भन्छ, “पवित्र आत्मा तिमीहरूभित्र घरमा हुनुहुन्छ ।” हो, उहाँ त्यही बस्नुहुन्छ– तपाईंभित्र !
बाइबल भन्छ, “मूर्तिहरूसँग परमेश्वरको मन्दिरको के सम्झौता ? किनभने हामी जीवित परमेश्वरका मन्दिर हौं,” जसरी परमेश्वरले भन्नुभएको छ, “म तिनीहरूमा वास गर्नेछु, र तिनीहरूका बीचमा हिँड्डुल गर्नेछु, र म तिनीहरूका परमेश्वर हुनेछु, अनि तिनीहरू मेरा प्रजा हुनेछन्” (२ कोरिन्थी ६:१६) ।
अब ती तीन वटै खण्डहरूलाई एकै स्थानमा राखेर पढ्नुहोस् त : यूहन्ना १४:२३; १ कोरिन्थी ३:१६; २ कोरिन्थी ६:१६
येशूले तिनलाई जवाफ दिई भन्नुभयो, “जसले मलाई प्रेम गर्छ, त्यसले मेरो वचन पालन गर्नेछ, र मेरा पिताले त्यसलाई प्रेम गनुहुनेछ, र हामी त्यसकहाँ आउनेछौं, र त्यससँग वास गर्नेछौं… के तिमीहरूलाई थाहा छैन, तिमीहरू परमेश्वरका मन्दिर हौ, र परमेश्वरका पवित्र आत्मा तिमीहरूमा वास गर्नुहुन्छ ?… मूर्तिहरूसँग परमेश्वरको मन्दिरको के सम्झौता ? किनभने हामी जीवित परमेश्वरका मन्दिर हौं, जसरी परमेश्वरले भन्नुभएको छ, “म तिनीहरूमा वास गर्नेछु, र तिनीहरूका बीचमा हिँड्डुल गर्नेछु, र म तिनीहरूका परमेश्वर हुनेछु, अनि तिनीहरू मेरा प्रजा हुनेछन् ।”
परमेश्वरले यसो भनेर के भन्दै हुनुहुन्थ्यो भन्ने कुराको गहिराइमा हामी कहिल्यै पुग्न सकेका छैनौँ, “म तिनीहरूमा वास गर्नेछु । म तिनीहरूभित्र बस्नेछु । म तिनीहरूका बीचमा हिँड्डुल गर्नेछु ।” यदि परमेश्वर हामीभित्र विराजमान हुनुहुन्छ भने— वास्तवमा उहाँ हामीभित्रै हुनुहुन्छ— त्यहीँ नै परमेश्वर हामीसँग बातचित गर्नुहुन्छ ।
***
(यो अनुच्छेद शब्द प्रकाशनद्वारा प्रकाशित केनथ ई. हेगनको ‘परमेश्वरका आत्माद्वारा कसरी डोर्याइने’ पुस्तकबाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
