पहिलो कोरिन्थी ९:२७ मा पावल भन्छन्, “म मेरो शरीरलाई कठोरतासाथ सधाउँछु र यसलाई वशमा राख्तछु ।” यसको अर्थ, पावलले आफ्नो शरीरलाई त्यसले गर्न चाहे जति सबै कुरा गर्ने अनुमति दिएनन् । आधाभन्दा बढी नयाँ करार लेखेका प्रेरित पावलजस्ता परमेश्वरका महान् सेवकले त आफ्नो शरीरलाई आफ्नो आत्माको वशमा राख्नुपर्यो भने, निश्चय नै, उनको शरीरले खराब कुरा गर्न चाहेको थियो भनी हामीले बुझ्नु आवश्यक छ । हो, पावलले पनि आफ्नो शरीरलाई हामीले झैँ आफ्नो आत्माको अधीनमा राख्नुपरेको थियो ।
धेरै पटक विश्वासीहरू भूत आत्मा निकाल्ने प्रयास गर्छन्, जब कि वास्तविक समस्या त उनीहरूको शारीरिक लालसा हुन्छ ! तपाईंले आफ्नो शरीरलाई निकालेर फ्याँक्न सक्नुहुन्न ! अनि धेरै अवस्थाहरूमा, मानिसहरू परमेश्वरले उनीहरूको शरीरका लागि केही गर्नुभएको चाहन्छन् । परमेश्वरले तपाईंको शरीरका लागि केही पनि गर्नुहुन्न । आखिरमा, शरीर परमेश्वरको होइन, शरीर त तपाईंको हो । तपाईंको शरीरमा तपाईंकै अधिकार हुन्छ ।
जब तपाईं नयाँ गरी जन्मनुहुन्छ, तब तपाईंको भित्री मनुष्यत्व परमेश्वरको हुन्छ । तर उक्त समयमा तपाईंले आफ्नो शरीरलाई नयाँ जन्म पाएको आत्माको अधीनमा राख्ने निर्णय गर्नै पर्छ, जुन तपाईंले आफ्नो शरीर जिउँदो बलिका रूपमा परमेश्वरलाई चढाएपछि मात्र सम्भव छ ।
रोमी १२:१ मा विश्वासीहरूले आफ्ना शरीर परमेश्वरलाई चढाउनुको महत्त्वको विषयमा पावलले चर्चा गरेका छन् ।
रोमी १२:१ (ने.बा.सो. संस्करण)
१. यसकारण भाइ हो, परमेश्वरको कृपालाई ध्यानमा राखी म तिमीहरूलाई अनुरोध गर्दछु, कि तिमीहरूको आत्मिक उपासनाको रूपमा आ-आफ्ना शरीरलाई पवित्र र परमेश्वरलाई ग्रहणयोग्य हुने जिउँदो बलिको रूपमा अर्पण गर ।
यी पदहरूले भन्न खोजेको कुरा पूर्ण रूपमा बुझ्दा म आश्चर्यचकित भएको थिएँ । पावलले यो पत्र पापी मानिसहरूका लागि लेखेका थिएनन् । उनले ख्रीष्टका सन्त अर्थात् विश्वासीहरूका निम्ति यो पत्र लेखेका थिए । विश्वासीहरूको नयाँ जन्म भए पनि उनीहरूको शरीर नयाँ गरी जन्मिएको छैन र आफ्नो शरीरका लागि विश्वासी स्वयम्ले केही गर्नुपर्छ भनेर पावल यहाँ बताइरहेका छन् ।
यदि तपाईंले आफ्नो शरीरलाई ‘जिउँदो बलि’ का रूपमा चढाउनुभएन भने, तपाईंको शरीरले उद्धार पाउनुअघि शैतानको अधीनमा रहँदा गरेकै कुरा निरन्तर गर्न चाहन्छ । हो, शरीर शैतानकै अधीनमा रहन चाहन्छ, जो यस संसारको ईश्वर हो (एफिसी २:२) । अर्को शब्दमा भन्दा, ख्रीष्ट येशूमा नयाँ सृष्टि भएको तपाईंको आत्माको अधीनमा तपाईंले आफ्नो शरीरलाई राख्नुभएन भने, तपाईंले दुष्ट आत्माहरूका लागि आफ्नो ढोका खुल्ला राख्नुहुन्छ किनभने भूत आत्माहरू जहिले पनि प्राण र शरीरद्वारा मानिसमाथि शासन गर्ने दाउमा हुन्छन् ।
परमेश्वरका एक सेवकको जीवनमा यस्तै घटना भएको मैले देखेको छु । उनी एक गज्जबका विश्वासी थिए– एक दयालु र असल व्यक्ति, जो पेन्टिकोस्टल समुदायका एक अगुवा थिए । वर्षौंसम्म उनको स्वास्थ्य एकदमै राम्रो थियो तर कालान्तरमा उनी शारीरिक रूपमा अस्वस्थ भए । उनलाई तीन पटक मानसिक आघात भयो, जसले उनको दिमागमा असर गर्यो ।
उनी आंशिक रूपमा पक्षाघातका [PARALYSIS] बिरामी थिए । समय समयमा उनको व्यवहार एकदमै भिन्न हुने गर्थ्यो मानौँ उनी अर्कै व्यक्ति हुन् । उनी आफ्नी श्रीमतीलाई सराप्ने-पिट्ने गर्थे । उनकी श्रीमती र छोरी मिलेर उनका लागि धेरै प्रार्थना गर्थे । उनी आफैँले पनि अन्य भाषामा प्रार्थना गर्दा केही समयका लागि हलका भएझैँ हुन्थ्यो, तापनि उनले कहिल्यै छुट्कारा पाएनन् ।
‘विश्वासीको अधिकार’ विषयमा मैले दिएको शिक्षा सुनेपछि आफूले के गर्नुपर्थ्यो भनी बुझेको उनकी श्रीमतीले बताइन् । हृदयघातले उनको दिमागमा असर गरेका कारण उनी आफ्नो मन र शरीरको रेखदेख गर्न सक्दैन थिए । शैतानले उक्त अवस्थाको फाइदा उठायो ।
उनी एक भिन्न व्यक्ति बनेका थिए । यसको एउटा कारण हृदयघात थियो । यद्यपि, उनको यो अवस्थामा शैतान पनि सहभागी थियो । कसैले उद्धार पाएको होस् या नहोस्, ऊ प्राण र शरीरमा शैतानद्वारा उत्पीडित हुनसक्छ । उनकी श्रीमतीलाई प्रभु येशूको नाममा खडा भएर शैतानविरुद्ध कसरी अधिकार लिने भनी थाहा थिएन ।
ती सेवक शारीरिक रूपमा प्रभुमा गइसकेपछि मात्र उनकी श्रीमतीले आफू शैतानविरुद्ध खडा भएर परमेश्वरका सन्तानबाट आफ्नो हात निकाल्न त्यसलाई आज्ञा दिनुपर्ने रहेछ भनी बुझिन् । उनले त्यसरी अधिकारका साथ आज्ञा गर्दा शैतानले परमेश्वरको वचनको पालन गर्नै पर्छ भनेर मैले उनलाई विश्वास दिलाएँ !
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
