तपाईंको समझको आँखा प्रज्ज्वलित हुनु आवश्यक छ ताकि ख्रीष्टमा आफूले प्राप्त गरेको उत्तराधिकार तपाईंले जान्नुहुनेछ अनि त्यस ज्ञानलाई व्यवहारमा उतारेर लाभ हाँसिल गर्न सक्नुहुनेछ । अर्को शब्दमा, आफूले प्राप्त गरेको कुरा तपाईंलाई थाहा हुनसक्छ तर तपाईं त्यसअनुसार नचल्न सक्नुहुन्छ । वचनले के भनेको छ भनी तपाईंलाई थाहा हुनसक्छ तर तपाईं उक्त वचनअनुसार चल्ने व्यक्ति नहुन सक्नुहुन्छ ।
तपाईंसँग आशिष्, अधिकार, अवसर आदि हुन सक्छन् तर त्यसको बारेमा तपाईंले जान्नुभएन भने वा तपाईंसँग ज्ञान छैन भने, तपाईंले त्यसलाई व्यवहारमा उतार्न सक्नुहुन्न । अथवा आफूले जानेको ज्ञानमा तपाईं चल्नुभएन भने र आफूलाई दिइएको कुरालाई अभ्यास गरेर स्थापित गर्नुभएन भने, त्यसले तपाईंलाई कुनै लाभ दिनेछैन । कानुनी रूपमा त्यो तपाईंको आफ्नै भए पनि त्यो तपाईंका निम्ति वास्तविकता बन्नेछैन ।
त्यसैले ख्रीष्टमा आफूले प्राप्त गरेको उत्तराधिकार तपाईंले जान्नु आवश्यक छ तर आफ्ना आशिष् तथा अधिकारको ज्ञान हुनु मात्र पर्याप्त छैन । व्यवहारमा लागू गरिएको ज्ञानले मात्र प्रतिफल दिन्छ ।
ख्रीष्टमा आफूले प्राप्त गरेको अधिकार ख्रीष्टका सन्तानले जानेको शैतान चाहँदैन । परमेश्वरका सन्तानलाई पराजित गर्नका लागि शैतानले प्रयोग गर्न प्रयास गर्ने क्षेत्रमध्ये यो एउटा हो । जब परमेश्वरका सन्तानले आफ्नो अधिकार तथा आशिष् के हो भनी जान्दछन्, तब उनीहरूले आफूमाथि राज्य गर्नेछन् भनी शैतानलाई थाहा छ ।
त्यसैकारण यो ज्ञानलाई अस्पष्ट वा धमिलो बनाएर शैतानले मानिसको समझको आँखालाई अन्धो तुल्याउन चाहन्छ । यसरी यो अत्यावश्यक ज्ञानलाई विश्वासीहरूबाट टाढा राख्न चाहन्छ तर यदि परमेश्वरको सन्तानले सत्य जान्यो भने र त्यो सत्यलाई व्यवहारमा लागू गर्यो भने, ऊ शैतानको प्रभुत्वमा रहनेछैन ।
यूहन्ना ८:३२ (ने.बा.सो. संस्करण)
३२. तब तिमीहरूले सत्य [वचन] के हो सो जान्नेछौ, र सत्य [वचन] ले तिमीहरूलाई स्वतन्त्र तुल्याउनेछ ।
सत्यले तिमीहरूलाई स्वतन्त्र तुल्याउनुअघि तिमीहरूले सत्य [वचन] जान्नु आवश्यक छ । उपरोक्त पदले भनेको कुरा यही हो । ख्रीष्टमा म को हुँ भनेर परमेश्वरको वचनको सत्यता जानिसकेपछि, जब तपाईंले त्यस सत्यतामा कदम चाल्नुहुन्छ, तब तपाईं स्वतन्त्र हुनुहुनेछ ।
यो अत्यन्त महत्त्वपूर्ण छ । म यसलाई अलि भिन्न तरिकाले भन्छु ताकि तपाईंले यसको तात्पर्य पक्रन सक्नुहोस् :
- वचनले तपाईंलाई स्वतन्त्र पार्नुअघि तपाईंले वचन जान्नै पर्छ ।
- त्यसपछि, आफूले जानेको वचनलाई व्यवहारमा लागू गर्नुपर्छ ।
- अनि आफूले जानेर लागू गरिएको वचनको सत्यताले तपाईंलाई स्वतन्त्र गर्नेछ ।
जब तपाईं आफूले जानेको वचनमा हिँड्न सुरु गर्नुहुन्छ, तपाईंले हरेक परिस्थितिमा शैतानका शक्तिविरुद्ध विजय हाँसिल गर्नुहुन्छ ।
२ कोरिन्थी २:१४ (ने.बा.सो. संस्करण)
१४. तर परमेश्वरलाई धन्यवाद होस्, उहाँले हामीलाई ख्रीष्टमा सधैँ विजयका निम्ति डोर्याउनुहुन्छ र उहाँको ज्ञानको सुबास्ना हामीद्वारा हरेक स्थानमा फैलाउनुहुन्छ ।
हामीसँग परमेश्वरले जीवनको हरेक परिस्थितिमा विजयको घोषणा गर्नुभएको छ । त्यसैले कष्ट तथा परीक्षाहरूले तपाईंलाई जित्नुहुँदैन । माथिको पदमा यसो भनिएको छैन, “…परमेश्वरलाई धन्यवाद होस्, उहाँले हामीलाई ख्रीष्टमा कहिलेकहीँ शैतान तथा परिस्थितिहरूमाथि विजयमा डोर्याउनुहुन्छ ।” किनभने प्रभु येशूले ती सबै दुष्ट शक्तिहरूमाथि विजय प्राप्त गर्नुभयो अनि तपाईं उहाँमा हुनुभएकोले उहाँको विजय तपाईंको विजय हो ।
२ कोरिन्थी २:१४ (कोनिवियर अङ्ग्रेजी अनुवाद)
१४. तर परमेश्वरलाई धन्यवाद भएको होस्, जसले मलाई शृङ्खलाबद्ध तरिकाले एकपछि अर्को गर्दै आफ्नो विजयमा डोर्याउनुहुन्छ, ताकि आफ्नो शत्रु [शैतान तथा भूत आत्मालगायत त्यसका दूत गणहरू] विरुद्धको ख्रीष्टको जितमा म उत्सव मनाउन सकूँ ।
यस तथ्यको आधारमा, शैतान र त्यसका कामहरूप्रति हाम्रो धारणा कस्तो हुनुपर्छ ? डरले लुरुक्क परी थरथर काम्ने खालको ? अहँ, होइन । हामीलाई प्रेम गर्नुहुनेद्वारा हामी विजेताहरूभन्दा पनि अझ बढी छौँ (रोमी ८:३७) ।
ख्रीष्टको देह भएका कारण हामीले पृथ्वीमा प्रभु येशूको स्थान लिइरहेका छौँ । प्रभु येशू शिर हुनुहुन्छ र हामी उहाँका शरीर हौँ । जीवनका गतिविधीहरूमा हामी यस पृथ्वीमा प्रभु येशूका लागि काम गरिरहेका छौँ । येशू शत्रुका अधिकार नाश गर्नेवाला हुनुहुन्छ र पृथ्वीमा हामीले शैतानको त्यो पराजयलाई लागू गर्नुपर्छ ।
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
