हाम्रो शरीरले नयाँ जन्म पाएको छैन भनेर हामीले जान्नु महत्त्वपूर्ण छ । अनि हाम्रो शरीरले नयाँ जन्म पाइनसकेका कारण हामी यही शरीरद्वारा– हाम्रा पाँच इन्द्रियहरूद्वारा– नै संसारको सम्पर्कमा रहन्छौँ, जुन संसारको ईश्वर शैतान हो (२ कोरिन्थी ४:४) । त्यसैले तपाईंले अर्थात् तपाईंको भित्री मनुष्यत्वले आफ्नो शरीरलाई आफ्नो नियन्त्रणमा राख्नुपर्छ । यदि तपाईंले आफ्नो शरीरले जे चाहन्छ, त्यही गर्नुभयो भने वा आफ्नो मनमा जे कुरा आउँछ, त्यसैमा सोचमग्न हुनुभयो भने, शैतानले सजिलै तपाईंको मन तथा शरीरमा प्रवेश गरेर तपाईंलाई शासन गर्न सक्छ ।
यस विषयमा विचार गर्नुहोस् त । के तपाईंको शरीरले खराब कुरा गर्न चाहँदैन र ? निश्चय नै, चाहन्छ । उद्धार भएको जति नै वर्ष भए पनि वा तपाईं जति नै आत्मिक हुनु भए तापनि हरेक व्यक्तिको शरीरले खराब कुरा गर्न चाहन्छ किनभने शरीरको उद्धार भएकै हुँदैन । हाम्रो शरीरको उद्धारको प्रतिज्ञा-पत्र हामीसँग छ (१ कोरिन्थी १५:५३) । तर यो जीवनमा हाम्रो शरीरका लागि हामीले केही गर्नै पर्छ अन्यथा शैतानले त्यसबाट ठूलो फाइदा उठाउनेछ ।
हाम्रो शरीरलाई के गर्नुपर्छ भनी वचनले हामीलाई निम्न सुझावहरू दिएको छ :
- तपाईंले आफ्नो शरीरलाई पवित्र एवम् ग्रहणयोग्य जिउँदो बलिका रूपमा परमेश्वरलाई चढाउनुपर्छ (रोमी १२:१) ।
- तपाईंले शरीरको स्वभावलाई मार्नुपर्छ वा क्रूसमा टाँग्नुपर्छ (कलस्सी ३:५) ।
- तपाईंले आफ्नो शरीरलाई कठोरतासाथ आफ्नो आत्माको वा भित्री मनुष्यत्वको अधीनमा राख्नुपर्छ (१ कोरिन्थी ९:२७) ।
तपाईंसँग आफ्नो शरीरको नियन्त्रण छ । त्यसकारण तपाईंले आफ्नो शरीरलाई जे पायो त्यही गर्नबाट रोक्न सक्नुहुन्छ । तपाईंले आफ्नो शरीरलाई नियन्त्रण गर्न सक्नुहुन्छ भनेर परमेश्वरले भन्नुभएको छ । तपाईंले आफ्नो शरीरलाई दुष्टता तथा अधार्मिकताको साधनका रूपमा प्रयोग गर्नका लागि शैतानलाई अनुमति दिनुहुँदैन (रोमी ६:१३) ।
याद गर्नुहोस्, कलस्सी १:१२ मा भनिएको छ– परमेश्वरले हामीलाई ज्योतिका सन्तहरूका उत्तराधिकारका सहभागी हुन सक्षम तुल्याउनुभएको छ । यसको अर्थ हामी शरीरको पछि नलागेर आत्मामा हिँड्न सक्छौँ । यसको अर्थ, हामी शरीरका अभिलाषाद्वारा शैतानका परीक्षाहरूमा समर्पित हुनुपर्दैन ।
शरीरको सवालमा परमेश्वरको वचन कसरी पालन गर्ने भनी बुझ्न पवित्रशास्त्रले मानिसको भित्री मनुष्यत्व र बाहिरी मनुष्यत्वबीच अर्थात् शरीर र आत्माबीच भेद छुट्याएको छ भनी बुझ्नु आवश्यक छ ।
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
