के तपाईं कहिल्यै बिरामी व्यक्तिलाई भेट्न जानुभएको छ ? बसेर उनीहरूका मनका कुरा सुन्नुभएको छ ? उनीहरूका कुरा सुन्नुभएको छ भने, उनीहरू बिरामी हुनुका कारणहरू अवश्य थाहा पाउन सक्नुहुन्छ ।
हितोपदेश १२:१८ अद्भुत प्रकाश भएको पद हो । यस पदमा आश्चर्यमा पार्ने सत्यता पाउन सकिन्छ, “कटुतापूर्ण वचन बोल्नेले तरवारले झैँ घोच्छ, तर बुद्धिमान्को बोलीले निको पार्छ” (बिलिभर्स चर्च संस्करण) । जबसम्म तपाईं असल स्वास्थ्य बोल्नुहुन्न वा तपाईंका शब्दहरूले सुस्वास्थ्यको स्वीकार गर्दैनन्, तबसम्म तपाईं स्वस्थ रहन सक्नुहुन्न ।
हामी गलत विचार-पद्धतिमा हुर्काइएका छौँ भन्ने कुरालाई के तपाईंले कहिल्यै ध्यान दिनुभएको छ ? [म स्वाभाविक दुनियाँको दृष्टिबाट बोलिरहेको छु ।] हामी नकारात्मक दृष्टिकोणमा वा ढाँचामा निर्माण गरिएका छौँ ?
“धन्य हो त्यो मानिस, जो दुष्टहरूको सल्लाहमा हिँड्दैन, जो पापीहरूको मार्गमा खड़ा हुँदैन, अनि गिल्ला गर्नेहरूको सङ्गतमा बस्दैन” (भजन १:१; ने.बा.सो. संस्करण) । तपाईंको सोच संसारको भन्दा फरक हुनुपर्छ भनेर बाइबलले बताएको छ ।
रोमी १२:१ मा यसरी लेखिएको छ, “यसकारण भाइ हो, परमेश्वरको कृपालाई ध्यानमा राखी म तिमीहरूलाई अनुरोध गर्दछु, कि तिमीहरूको आत्मिक उपासनाको रूपमा आ-आफ्ना शरीरलाई पवित्र र परमेश्वरलाई ग्रहणयोग्य हुने जिउँदो बलिको रूपमा अर्पण गर” (ने.बा.सो. संस्करण) ।
दोस्रो पदलाई याद गर्नुहोस्, “यस संसारको ढाँचामा नचल, तर आफ्नो मनमा नयाँ भई पूर्ण रूपले परिवर्तित होओ, र परमेश्वरको असल, ग्रहणयोग्य र सिद्ध इच्छा के हो, त्यो तिमीहरूले जाँच्न सक ।” (रोमी १२:२; ने.बा.सो. संस्करण) । तपाईं यस संसारको ढाँचामा चलेको होइन तर उहाँको स्वरूपमा रूपान्तरण भएको परमेश्वर चाहनुहुन्छ । कसरी ? परमेश्वरको वचनद्वारा आफ्नो मनको नवीकरण गरेर । यस संसारले सोच्ने शैलीमा नसोच्नुहोस् । संसार नकारात्मक छ ।
जब कुनै मानिस अचानक आत्तिन्छ, तब ऊ भन्छ, “त्यसले मलाई मर्नेगरी तर्सायो ।” मानौँ उसले मृत्युकै सामना गर्यो ।
त्यसो कहिल्यै नभन्नुहोस् । आत्तिएँ भनी म कहिल्यै भन्दिनँ, किनकि म आत्तिएको हुन्नँ ।
यदि आत्तिने वा डराउने परिस्थितिहरू आए भने, म त्यस्ता परिस्थितिहरूको सामना गर्छु– म डरप्रति बोल्छु । म यसो भन्छु, “डर, म प्रभु येशू ख्रीष्टको नाउँमा तँलाई इन्कार गर्छु !” म डराउँदिनँ । यदि मेरो मनमा शङ्का आयो भने, म त्यसलाई भन्छु, “शङ्का, म तँलाई येशू ख्रीष्टको नाउँमा इन्कार गर्छु !” म शङ्का गर्दिनँ ।
मेरो मनमा डर, चिन्ता वा शङ्काको विचार आयो भने, म कसैलाई भन्दिनँ । म ती सांसारिक विचार स्विकार्दिनँ । यदि त्यस्तो विचार आइहाल्यो भने पनि, म कसैलाई भन्दिनँ । मलाई थाहा छ, शैतानले तपाईंको मनमा अनेक प्रकारका विचार तथा कुराहरू ल्याउन सक्छ ।
हामी शब्दहरूका प्रतिफल हौँ । तपाईंको बोलीमा स्वास्थ्य र चङ्गाइ छ भनेर पवित्र बाइबलले सिकाएको छ । यस कुरामा के तपाईंले कहिल्यै विचार गर्नुभएको छ ? “बुद्धिमान्को बोलीले बिरामी निको पार्छ” भनेर परमेश्वरले बताउनुभएको कुरालाई के तपाईंले कहिल्यै ख्याल गर्नुभएको छ ?
म कहिल्यै बिमार बोल्दिनँ । म रोगबिमारमा विश्वास गर्दिनँ । म स्वास्थ्यको विषयमा कुरा गर्छु । बुद्धिमान्को बोलीले रोगबिमार निको पार्छ । पवित्र बाइबलले “बुद्धिमान्को बोली नै स्वास्थ्य हो” भनेको छ ।
म स्वास्थ्य बोल्छु । म ईश्वरीय चङ्गाइमा विश्वास गर्छु । म सुस्वास्थ्यमा विश्वास गर्छु । म कहिल्यै रोगबिमारको कुरा गर्दिनँ । म चङ्गाइको कुरा गर्छु ।
म कहिल्यै असफलता बोल्दिनँ । म असफलतामा विश्वास गर्दिनँ । म सफलतामा विश्वास गर्छु । म कहिल्यै पराजय बोल्दिनँ । म पराजयमा विश्वास गर्दिनँ । म विजयमा विश्वास गर्छु । हाल्लेलूयाह !
शैतानले गरेका कार्यहरूको म कहिल्यै चर्चा गर्दिनँ । म त्यसका काममा रुचि राख्दिनँ । म परमेश्वरका कामहरूका बारेमा रुचि राख्छु । परमेश्वरको स्तुति होस् ! म शैतानको सामर्थ्यको विषयमा चर्चा गर्दिनँ किनभने शैतान परमेश्वरसँग तुलना गर्न योग्य छैन ।
प्रभु येशूले भन्नुभयो, “…म युगको अन्त्यसम्म सधैँ तिमीहरूका साथमा छु” (मत्ती २८:२०; ने.बा.सो. संस्करण) । यदि उहाँ मसँग हुनुहुन्छ भने, त्यो सफलता हो भनी म विश्वास गर्छु ।
रोमी ८:३१ मा बाइबलले भनेको छ, “यदि परमेश्वर नै हाम्रो पक्षमा हुनुहुन्छ भने, हाम्रो विरुद्धमा को हुन्छ र ?” (विक्लिफ नेपाली संस्करण) । परमेश्वरको महिमा होस् ! परमेश्वर हामीसँग हुँदा हामीविरुद्ध जोसुकै भए तापनि के फरक पर्छ र ? शैतानले संसारमा गरिरहेको कामले के फरक पार्छ ? परमेश्वर हामीसँग हुनुहुन्छ ! परमेश्वर हाम्रो पक्षमा हुनुहुन्छ !
पहिलो यूहन्ना ४:४ भन्छ, “मेरा प्रिय बालकहरू हो, तिमीहरू परमेश्वरका हौ र तिमीहरूले ती आत्माहरूलाई जितेका छौ किनभने तिमीहरूमा जो हुनुहुन्छ, उहाँ संसारमा हुनेभन्दा महान् हुनुहुन्छ” (विक्लिफ नेपाली संस्करण) । यदि तपाईंभित्र सबैभन्दा सामर्थी वास गर्नुहुन्छ भने, आफूले सामना गर्ने परिस्थितिको बारेमा तपाईं किन चिन्ता लिनुहुन्छ ?
अन्य मानिसहरूले झैँ मैले पनि चिन्तारूपी परीक्षाको सामना गरेको छु । यद्यपि, म चिन्तित हुँदिनँ । म निराश हुँदिनँ । मेरो मुखबाट निराशा र चिन्ताका शब्दहरू निस्कँदैनन् । मेरो मुखबाट पराजय र असफलताका शब्दहरू निस्कँदैनन् ।
कोही मानिसहरू भन्छन्, “म चुरोट पिउँदिनँ । परमेश्वरले मलाई यसबाट छुट्कारा दिनुभयो ।” यसो भन्दा उनीहरू धेरै गर्वको महसुस गर्छन् । त्यो राम्रो कुरो हो तर म चाहन्छु, उनीहरूले त्योभन्दा ठूलो पापबाट अर्थात् चिन्ताको पापबाट छुट्कारा पाऊन् । चिन्ताको पाप चुरोट पिउने पापभन्दा खराब हो ।
धुम्रपान र मध्यपान दुवै खराब हुन् । म यिनीहरूको पक्षमा छैनँ । यस्तो लत मसँग छैन । चिन्ता यी दुवै पापभन्दा पनि खराब हो । विश्वासीहरू यी दुवै लतबाट बच्नुपर्छ ।
चिन्ताले तपाईंलाई मार्छ । धेरै डाक्टरहरूले मलाई यो बताएका छन् अनि मैले पत्रपत्रिकाहरूमा पनि पढेको छु, “अन्य कुनै कारणभन्दा पनि चिन्ताको कारण आज धेरै मानिसहरू पागलखानामा छन्; मानसिक अस्पतालमा छन् । हाम्रो समाजमा यो भनाइ धेरै चर्चित छ, ‘चिन्ता चितासमान हो ।’ त्यसैकारण धेरै मानिसहरू समयभन्दा पहिले चिहानमा पुग्ने गरेका छन् ।”
मानिसहरू केको बारेमा धेरै चिन्ता गर्छन् ? परिस्थितिको बारेमा । उनीहरू भोलिको बारेमा चिन्ता गर्छन् । उनीहरू आफूले सामना गरिरहेको समस्याको बारेमा चिन्ता गर्छन् ।
भोलिका निम्ति तथा आफूले सामना गरिरहेको परिस्थितिका निम्ति चिन्ता गर्न शैतानले धेरै पटक मलाई परीक्षामा पारेको छ । यस्ता अवस्थाहरूमा, परिस्थिति देख्दा यस्तो लाग्छ मानौँ मैले त्यसबाट कहिल्यै पार पाउन सक्दिनँ तर त्यति बेला पवित्र बाइबलको यो वचन सम्झन्छु, “…तिमीहरूमा जो हुनुहुन्छ, उहाँ संसारमा हुनेभन्दा महान् हुनुहुन्छ” (यूहन्ना ४:४) । यी कुराहरूका निम्ति मलाई प्रार्थना गर्ने आवश्यकता पनि पर्दैन । त्यस्तो अवस्थामा म परिस्थितिको मुखमा हेर्छु अनि हृदयबाट अट्टहाँस हाँसिदिन्छु, “हा… हा… हा… !” प्रभुको स्तुति होस् !
मैले परिस्थितिलाई हेर्दै भनेँ, “यदि मैले आफ्नो मार्ग तँमाथिबाट बनाउन सकिनँ भने, तेरो छेउबाट बनाउनेछु । यदि तेरो छेउबाट बनाउन सकिनँ भने, तँमुनिबाट बनाउनेछु अनि यदि तेरो मुनिबाट पनि बनाउन सकिनँ भने, तेरो बीचबाट बनाउनेछु किनभने महान् परमेश्वर मभित्र हुनुहुन्छ ।”
अनि हेर्नुहोस्, म हाँस्दै गर्दा त्यो परिस्थितिले मलाई छाडेर भाग्यो ।
मभित्र सबैभन्दा महान् परमेश्वर वास गर्नुहुन्छ । जो तपाईंमा हुनुहुन्छ, उहाँ संसारमा हुनेभन्दा धेरै महान् हुनुहुन्छ । अँ, संसारमा चाहिँ को छ नि ? शैतान यस संसारको ईश्वर हो । संसारमा अरू के छ ? पाप छ, तर सबैभन्दा महान्चाहिँ मभित्र हुनुहुन्छ । उहाँ पापभन्दा धेरै महान् हुनुहुन्छ । उहाँले पापलाई पराजित गर्नुभयो । उहाँले पापलाई पूर्ण रूपमा मेटिदिनुभयो ।
संसारमा अरू के छ नि ? संसारमा रोगबिमार छ । यो परमेश्वरबाटको होइन । रोगबिमार स्वर्गबाट आउँदैन । स्वर्गमा कुनै रोगबिमार छैन । यो त संसारको हो । मभित्र हुनुहुने सर्वशक्तिमान् हुनुहुन्छ । उहाँ रोगबिमारभन्दा महान् हुनुहुन्छ किनभने उहाँ चङ्गाइकर्ता हुनुहुन्छ ।
अनि संसारमा अरू के छ नि ? संसारमा समस्या तथा प्रतिकूलताहरू छन् । यही पुरानो संसारका समस्याहरूका बारेमा मानिसहरू सधैँ चर्चा परिचर्चा गरिरहेका हुन्छन् तर मभित्र हुनुहुनेचाहिँ संसारका समस्या तथा परिस्थितिहरूभन्दा महान् हुनुहुन्छ ।
संसारमा अरू के छ ? विपरीत तथा जटिल परिस्थितिहरू छन् । संसारमा झट्ट हेर्दा असम्भव देखिने परिस्थितिहरू छन् तर म यस संसारको होइनँ । म संसारमा छु तर म संसारको भने होइनँ । मेरो नागरिकता स्वर्गको हो, परमेश्वरको स्तुति होस् ! म यस संसारमा रहुन्जेल महान् परमेश्वर मभित्र वास गर्नुहुन्छ । उहाँ यस संसारमा हुनेभन्दा महान् हुनुहुन्छ । उहाँले मलाई विजय दिनुहुन्छ । उहाँले मलाई सफलता दिनुहुन्छ । हाल्लेलूयाह ! म पराजित हुनेछैनँ !
यही मेरो स्वीकारोक्ति हो । यही मेरो शब्द हो; बोलीवचन हो । यही मेरो घोषणा हो । १७ वर्षको उमेरदेखि अहिलेसम्म मैले यस्तै प्रकारका शब्दहरू बोल्दै आएको छु । वचन ! वचन ! वचन ! विश्वासले भरिएको वचन ! सामर्थ्यले भरिएको वचन ! सकारात्मक वचन ! परमेश्वरको वचन !
(यो लेख शब्द प्रकाशनद्वारा नेपालीमा प्रकाशित केनथ ई. हेगनको पुस्तक ‘शब्दको प्रभाव’ बाट साभार गरिएको हो । यस विषयमा थप ज्ञानका लागि हामी तपाईंलाई उक्त पुस्तक पढ्ने सल्लाह दिन्छौँ ।)
