यो कुरा सदैव ध्यानमा राख्नुहोस्, छुट्काराको सेवकाइ गर्दा प्रभु येशूले परमेश्वरको पुत्रको हैसियतले आफ्नो समार्थ्यको प्रयोग गर्नुभएन । बाइबल भन्छ– उहाँ आफ्ना सबै स्वर्गीय वैभव, शक्ति तथा सामर्थ्यलाई त्यागेर यस पृथ्वीमा आउनुभयो र मानिसको रूप धारण गर्नुभयो (फिलिप्पी २:७) ।
प्रभु येशू असीमित नापमा परमेश्वरको आत्माद्वारा भरिपूर्ण हुनुहुन्थ्यो भन्ने कुरा सत्य हो (यूहन्ना ३:३४) । यद्यपि, विश्वासीहरूसँग सीमित मात्रामा परमेश्वरको आत्मा हुनुहुन्छ (रोमी १२:३) । यद्यपि, पृथ्वीको आफ्नो सेवकाइ येशूले पवित्र आत्माद्वारा अभिषिक्त एक जना साधारण मानिसले झैँ गर्नुभयो । बन्धनमा परेकाहरूलाई छुट्कारा दिन आफू अभिषिक्त हुनुपर्ने कुरा येशू आफैँले भन्नुभयो (लूका ४:१८,१९) । अर्को शब्दमा, आफू परमेश्वरको पुत्र भएका कारणले मात्र उहाँले छुट्काराको सेवकाइ गर्नुभएको होइन । सेवकाइ गर्नका लागि जसरी हामी प्रत्येकलाई पवित्र आत्माको अभिषेकको खाँचो पर्छ, त्यसरी नै उहाँले पवित्र आत्माबाट अभिषेक प्राप्त गर्नुभएको थियो ।
छुट्काराको सेवकाइ गर्दा समेत प्रभु येशूले सधैँ वचनलाई सबैभन्दा अगाडि राख्नुभयो । कैदमा परेकाहरूलाई स्वतन्त्रताको सन्देश प्रचार गर्न र बिरामी तथा उत्पीडितलाई चङ्गाइ दिन पवित्र आत्माले आफूलाई अभिषेक गरेको कुरा प्रभु येशूले बताउनुभयो । प्रभु येशूले छुट्काराको प्रचार गर्नुभयो । यसको अर्थ उहाँले सुसमाचार प्रचार गर्नुभयो । प्रभु येशूले सधैँ वचनलाई पहिलो स्थानमा राख्नुभयो र उहाँ पवित्र आत्माद्वारा अभिषिक्त हुनुहुन्थ्यो ।
प्रभु येशूले गर्नुभएझैँ चङ्गाइ तथा छुट्काराको प्रचार तथा सेवकाइ गर्न हामीले पनि वचनलाई पहिलो स्थानमा राख्नुपर्छ र पवित्र आत्माको अभिषेकमा निर्भर हुनुपर्छ ।
प्रेरित १०:३८ (ने.बा.सो. संस्करण)
३८. …परमेश्वरले नासरतका येशूलाई पवित्र आत्मा र शक्तिले अभिषेक गर्नुभयो। उहाँ सुकर्म गर्दै र दियाबलसबाट पेलिएकाहरूलाई निको पार्दै हिँड्नुभयो, किनकि परमेश्वर उहाँको साथमा हुनुहुन्थ्यो ।
बाइबलले रोगबिमारलाई शैतानको पेलाइ भनेको छ । त्यसकारण हामी यो जान्दछौँ– सबै रोगबिमार प्रत्यक्ष वा अप्रत्यक्ष रूपमा शैतानको पेलाइका परिणाम हुन् ।
बाइबलअनुसार, कहिलेकहीँ रोगीलाई निको पार्ने काम र शैतान निकाल्ने कामहरू एक-आपसमा सम्बन्धित हुन्छन् । अर्को शब्दमा भन्दा, बाइबलले हामीलाई यस्ता उदाहरणहरू दिएको छ, जहाँ मानिसहरूको रोगी शरीर निको पार्नका लागि दुष्ट आत्मा निकाल्नु आवश्यक थियो ।
पवित्रशास्त्रका निम्न खण्डहरूमा रोगीलाई निको पार्ने काम र दुष्ट आत्मा निकालेर मानिसलाई छुट्कारा दिने कामबीचको सम्बन्धलाई हामी देख्न सक्छौँ ।
लूका ४:४०,४१ (विक्लिफ नेपाली संस्करण)
४०. साँझपख सूर्य अस्ताउने बेलामा धेरै प्रकारका रोग लागेका बिरामीहरूलाई येशूकहाँ ल्याइयो । उहाँले तिनीहरू सबैमाथि आफ्नो हात राख्नुभयो र सबैलाई निको पार्नुभयो ।
४१. तिनीहरूमध्ये धेरैबाट भूत आत्मा चिच्याउँदै बाहिर निस्केर यसो भन्यो, “तपाईं जीवित परमेश्वरका पुत्र हुनुहुन्छ ।” येशूले भूत आत्माहरूलाई हकार्नुभयो र तिनीहरूलाई बोल्न दिनुभएन, किनभने उहाँ ख्रीष्ट हुनुहुन्थ्यो भनी तिनीहरूलाई थाहा थियो ।
लूका ६:१७,१८ (ने.बा.सो. संस्करण)
१७. उहाँ तिनीहरूसँग तल ओर्लेर एउटा समतल जग्गामा खड़ा हुनुभयो । उहाँका शिष्यहरूको एउटा ठूलो भीड, र समस्त यहूदिया र यरूशलेम, र समुद्र तटवर्ती टुरोस र सीदोनका इलाकाबाट ठूलो भीड
१८. उहाँका वचन सुन्नलाई र आ-आफ्ना रोगबाट निको हुनलाई आएका थिए । अशुद्ध आत्माहरूबाट पीडितहरू पनि निको भए ।
लूका ७:२१ (ने.बा.सो. संस्करण)
२१. त्यसै बेला येशूले धेरैलाई रोग, व्यथा र दुष्टात्माहरूबाट छुटाउनुभयो, र धेरै अन्धाहरूलाई दृष्टि प्रदान गर्नुभयो ।
बाइबलका यी सबै खण्डहरूमा दुष्ट आत्मा निकाल्ने र रोगीलाई निको पार्ने काम एक-आपसमा जोडिएका देखिन्छन् ।
तर प्रभु येशूको छुट्काराको सेवकाइ हेर्दा तपाईंले यो पनि थाहा पाउनुहुनेछ कि प्रभु येशूले धेरै अवस्थाहरूमा रोगीलाई निको पार्ने काम र दुष्ट आत्मा निकाल्ने काममा भिन्नता देखाउनुभएको छ ।
अर्को शब्दमा, प्रभु येशूले बिरामी निको पार्नका लागि सधैँ उक्त व्यक्तिबाट भूत आत्मा निकाल्नुभएन किनभने सबै बिरामी व्यक्तिको शरीर वा मनमा दुष्ट आत्मा थिएन ।
यसले के अर्थ दिन्छ भने हामीसँग कुनै निश्चित नियम छैन । हामीले रोगी तथा उत्पीडितहरूको सेवकाइ गर्दा प्रभु येशूको जस्तै पवित्र आत्माको अनुसरण गर्नुपर्ने हुन्छ ।
सुसमाचारका पुस्तक आफैँ पढ्नुहोस् र प्रभु येशूले दुष्ट आत्माको सामना कसरी गर्नुभयो, सो थाहा पाउनुहोस् । कतिपय अवस्थाहरूमा रोगीबिरामी निको पार्न प्रभु येशूले दुष्ट आत्मा निकाल्नुभएको कुरा तपाईं पढ्न सक्नुहुन्छ ।
त्यसैगरी, अन्य अवस्थाहरूमा प्रभु येशूले विभिन्न तरिकाद्वारा रोगीलाई निको मात्र पार्नुभएको छ (मत्ती ८:१६; ९:२२,२९) । प्रभु येशूले भूत तथा दुष्ट आत्माको सामना गर्नका लागि पनि विभिन्न तरिका प्रयोग गर्नुभयो । उहाँले सधैँ दुष्ट आत्मा निकाल्नुभएन । उहाँले अन्य तरिकाद्वारा पनि दुष्ट आत्माका समस्या समाधान गर्नुभयो ।
आउनुहोस्, प्रभु येशूको सेवकाइको एउटा उदाहरण हेरौँ, जहाँ हामी दुष्ट आत्मा र रोगबिमारको सम्बन्ध देख्न सक्छौँ । दुष्ट आत्माको सामनामा प्रभु येशूले प्रयोग गर्नुभएको एउटा तरिका पवित्र आत्माको अभिषेकद्वारा मानिसहरूमाथि हात राख्नु हो ।
लूका १३:११-१३,१६
११. त्यहाँ एउटी स्त्री थिई, जसलाई अठार वर्षदेखि दुर्बल पार्ने दुष्टात्मा लागेको थियो। त्यो कुप्री परेकी थिई, र आफै पूर्ण रूपले सीधा हुन सक्दिनथिई ।
१२. येशूले त्यसलाई देख्नुभयो, र बोलाएर भन्नुभयो “ए नारी, तिमी आफ्नो दुर्बलताबाट मुक्त भयौ ।”
१३. तब उहाँले त्यसमाथि आफ्ना हात राख्नुभयो, र त्यो तुरुन्तै सीधा भई र परमेश्वरको प्रशंसा गर्न लागी ।
१६. अब्राहामकी यो छोरी जो अठार वर्षसम्म शैतानको बन्धनमा थिई, शबाथ-दिनमा यस बन्धनबाट त्यो मुक्त हुनुपर्ने होइन र ?”
ती स्त्रीको दुर्बलता एक दुष्ट आत्माका कारणले भएको थियो भनेर बाइबल बताउँछ– ‘दुर्बल पार्ने दुष्टात्मा’ (११ पद) । उनलाई शैतानले बन्धनमा राखेको थियो भनी प्रभु येशूले भन्नुभयो (१६ पद) ।
यो अवस्थामा, दुर्बलताको आत्मा स्त्रीको शरीरमा प्रवेश गरी उनको शरीरलाई त्यसरी दुर्बल पारेको थियो ।
तर प्रभु येशूले यहाँ त्यस दुष्ट आत्माको सामना कसरी गर्नुभयो, सो हेर्नुहोस् । उहाँले यहाँ दुष्ट आत्मालाई निकाल्नुभएन । उहाँले ती स्त्रीको शिरमा हात राख्नुभयो र विश्वासको आज्ञा दिनुभयो, “ए नारी, तिमी आफ्नो दुर्बलताबाट मुक्त भयौ” (पद १२) र ती स्त्री मुक्त भइन् ।
हेर्नुहोस्, जब अभिषेक वा पवित्र आत्माको सामर्थ्य ती स्त्रीमाथि आयो, उनले तुरुन्तै दुर्बलताको त्यो आत्माबाट छुट्कारा पाइन् अनि उनी सदाका लागि ‘स्वतन्त्र भइन्’ ।
शारीरिक दुर्बलतामा भूत आत्माको प्रत्यक्ष सहभागीता हुनसक्छ तर प्रभु येशूले दुर्बलताको त्यो आत्मालाई निकाल्नुभएन । उहाँले केवल उनीमाथि हात राख्नुभयो र अभिषेकले शैतानको बन्धनको जुवा तोड्यो ।
अरू अवस्थाहरूमा येशूले केही मानिसहरूबाट दुष्ट आत्मा निकाल्नुभयो । उहाँले त्यो कसरी गर्नुभयो ? आफ्नो वचनले !
मत्ती ८:१६ (ने.बा.सो. संस्करण)
१६. जब साँझ पर्यो, तब तिनीहरूले उहाँ [येशू] कहाँ भूत लागेका धेरै जनालाई ल्याए। र उहाँले वचनद्वारा नै भूतहरूलाई निकाल्नुभयो, र जति बिरामी थिए, सबैलाई निको पार्नुभयो ।
रोगबिमारका केही घटनाहरूमा, रोगबिमार स्वभाविक कारणले लाग्छ तर अप्रत्यक्ष रूपमा यो शैतानको उत्पीडन नै हो । यदि स्वभाविक कारणले रोगबिमार लागेको हो भने, उक्त व्यक्तिले चङ्गाइ पाउनु आवश्यक छ– त्यस व्यक्तिबाट दुष्ट आत्मा निकाल्नु आवश्यक छैन ।
अर्कोतिर दुष्ट आत्माको उपस्थितिले गर्दा कुनै मानिस रोगीबिरामी भएको हुन्छ । यो कुरा तपाईंले पवित्र आत्माद्वारा मात्र जान्न सक्नुहुन्छ ।
यदि पवित्र आत्माले कुनै मानिसमा दुष्ट आत्मा छ भनेर देखाउनुभएन भने, तपाईंले मानिसहरूलाई परमेश्वरको वचनप्रतिको विश्वास सिकाएर चङ्गाइ पाउन मद्दत गर्न सक्नुहुन्छ । तर अरू धेरै रोगबिमारहरू दुष्ट आत्मा निकालेपछि मात्र निको पार्न सकिन्छ । यो कुरामा पूर्ण विश्वस्त छु ।
अनि यी अवस्थाहरूमा, पवित्र आत्माको सामर्थ्य र निर्देशनमा दुष्ट आत्माको सामना नगरेसम्म तपाईं जति सुकै मिहिनेत गर्नुहोस्– बिरामी व्यक्तिको शिरको कपाल पूरै नगएसम्म टाउकोमा तेल लगाएर हात राख्नुहोस् वा अन्य जेसुकै गर्नुहोस्– तपाईंले बाइबलीय परिणाम प्राप्त गर्न सक्नुहुन्न ।
सामान्य रूपमा गरिने चङ्गाइको प्रार्थनाले त्यस्ता प्रकारका रोगहरूलाई निको पार्न सक्दैन । त्यस्ता अवस्थाहरूमा, पवित्र आत्माको अगुवाइ तथा उत्प्रेरणाद्वारा दुष्ट आत्माको सामना गर्नुपर्छ ।
कतिपय रोगबिमारहरू चिकित्सकीय उपचारबाट ठीक हुन नसक्नुको कारण यो हो । दुष्ट आत्माको उपस्थितिका कारणले लाग्ने रोगबिमार स्वभाविक उपचार-पद्धतिले ठीक हुँदैन ।
तर दुष्ट आत्मा नै रोगको प्रत्यक्ष कारण हो र उक्त व्यक्ति विश्वासमा वचनमाथि उभिएको छ भने, आफ्नो छुट्काराका लागि उसले परमेश्वरमाथि भरोसा गर्न सक्छ । यद्यपि, दुष्ट आत्माको सामना पवित्र आत्माको सामर्थ्य र परमेश्वरको वचनद्वारा गर्नुपर्छ ।
मर्कूस ९:१७-२९ मा प्रभु येशूले दुष्ट आत्माको सामना गर्नुभएको अर्को एउटा उदाहरण देख्न सक्छौँ । यस पटक भूत लागेको पागल ठिटोबाट प्रभु येशूले दुष्ट आत्मा निकाल्नुभएको छ । प्रभु येशूले त्यस दुष्ट आत्माको सामना कसरी गर्नुभयो ? उहाँले त्यस दुष्ट आत्मालाई डाँट्नुभयो र त्यस ठिटाबाट बाहिर निस्कने आज्ञा दिनुभयो ।
तर यस पटक पनि प्रभु येशूले उहाँमाथि भएको पवित्र आत्माको त्यही अभिषेकद्वारा दुष्ट आत्मा निकाल्नुभएको थियो, जुन दुर्बलताको आत्मा भएकी स्त्रीलाई स्वतन्त्र गर्दा उहाँमाथि थियो ।
रोगबिमार सधैँ भूत आत्माको उपस्थितिका कारणले हुँदैन । उदाहरणका लागि, मर्कूस ७:३२-३७ मा प्रभु येशूले एउटा मानिसको सामना गर्नुभयो, जो बहिरो र गुँगो थियो ।
निश्चय नै, यस दुर्बलतामा दुष्ट आत्माको उपस्थिति थिएन किनभने प्रभु येशूले केवल यस मानिसको कानमा आफ्नो औँला राख्नुभयो र भन्नुभयो, “खोलीजा !” त्यति नै बेला त्यसले सुन्न र बोल्न थाल्यो । प्रभु येशूले यहाँ दुष्ट आत्माको सामना गर्नुभएन । त्यसैकारण त्यस मानिसलाई केवल चङ्गाइको आवश्यकता थियो ।
यद्यपि, अर्को उदाहरणमा प्रभु येशूले एक बोल्न नसक्ने अर्थात् गुँगो मानिसको सेवा गर्नुभयो । यो समय त्यस मानिसलाई निको पार्नुअघि प्रभु येशूले एउटा दुष्ट आत्मा निकाल्नुपरेको थियो ।
मत्ती ९:३२,३३ (ने.बा.सो. संस्करण)
३२. जब उहाँहरू निस्केर जाँदैहुनुहुन्थ्यो, तब भूत लागेको एउटा गूँगो मानिस उहाँकहाँ ल्याइयो ।
३३. भूत निकालिएपछि त्यो गूँगो बोल्यो । अनि “इस्राएलमा कहिल्यै यस्तो देखिएन” भन्दै भीड छक्क पर्यो ।
मैले भन्न खोजेको कुरा के हो भने शैतान तथा दुष्ट आत्माको सामना गर्दा प्रभु येशूले कहिल्यै कुनै निश्चित नियम बनाउनुभएन । छुट्काराको सेवकाइमा पनि प्रभु येशूले पवित्र आत्माको अगुवाइको अनुसरण गर्नुभयो र पवित्र आत्माको सामर्थ्य र निर्देशनमा सेवकाइ गर्नुभयो ।
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
