रोमी १२:१,२ (ने.बा.सो. संस्करण)
१. यसकारण भाइ हो, परमेश्वरको कृपालाई ध्यानमा राखी म तिमीहरूलाई अनुरोध गर्दछु, कि तिमीहरूको आत्मिक उपासनाको रूपमा आ-आफ्ना शरीरलाई पवित्र र परमेश्वरलाई ग्रहणयोग्य हुने जिउँदो बलिको रूपमा अर्पण गर ।
२. यस संसारको ढाँचामा नचल, तर आफ्नो मनमा नयाँ भई पूर्ण रूपले परिवर्तित होओ, र परमेश्वरको असल, ग्रहणयोग्य र सिद्ध इच्छा के हो, त्यो तिमीहरूले जाँच्न सक ।
हेर्नुहोस्, परमेश्वर समर्पण गरिएको शरीर र परिवर्तित मन चाहनुहुन्छ । यसको पनि एउटा कारण छ । शैतानविरुद्ध तपाईंको सबैभन्दा महान् सुरक्षा त्यही हो भनी परमेश्वर जान्नुहुन्छ ।
परमेश्वरको वचनद्वारा जब तपाईंको मनको नवीकरण हुन्छ, तब तपाईंको सोचाइ परिवर्तन हुन्छ । जब तपाईंको सोचाइ परिवर्तन हुन्छ, तपाईंको व्यवहार परिवर्तन हुन्छ । शैतानको अधीनमा हुँदा तपाईं जसरी सोच्ने गर्नुहुन्थ्यो, जे-जस्तो व्यवहार गर्नुहुन्थ्यो, अब तपाईं त्यसो गर्नुहुन्न । जब तपाईंको सोचाइ र व्यवहार परिवर्तन हुन्छ, तब तपाईं परिवर्तन हुनुहुन्छ ।
आफ्नो शरीर र मन तथा प्राणका लागि आफैँले केही गर्नुपर्छ भनेर पावलले नयाँ जन्म पाएर पवित्र आत्माले भरिएका विश्वासीहरूका लागि लेखिरहेका थिए । विश्वासीहरूले आफ्नो शरीरलाई परमेश्वरसामु जिउँदो बलिदानका रूपमा अर्पण गर्नुपर्छ र वचनद्वारा आफ्नो मनमा नयाँ भई पूर्ण रूपले परिवर्तन हुनुपर्छ भनेर पावलले विश्वासीहरूलाई भनिरहेका थिए ।
एफिसी ४:२३,२४ (बिलिभर्स चर्च संस्करण)
२३. अनि आफ्नो मनको सोचाइमा नयाँ होओ ।
२४. र नयाँ मनुष्यत्व धारण गर, जुन परमेश्वरको स्वरूपको धार्मिकता र साँचो पवित्रतामा सृष्टि भएको छ ।
जब तपाईंको मनको नवीकरण हुन्छ, तब तपाईं आफ्नो जीवनका लागि परमेश्वरको असल, ग्रहणयोग्य र सिद्ध इच्छा के छ, त्यो जान्न सक्नुहुन्छ भनेर बाइबल बताउँछ (रोमी १२:२) । मनको नवीकरण गर्न तपाईंले परमेश्वरको वचनमा मनन् गर्नुपर्छ किनभने उहाँको वचन ‘आत्मा र जीवन’ हो र वचनसँग मानिसको मनलाई नयाँ बनाउने क्षमता हुन्छ ।
परमेश्वरको वचनमा मनन् गर्नुको अर्थ सक्रियतापूर्वक वचन पढ्नु, त्यसैमा विचार गर्नु, त्यही बोल्नु अनि त्यसैमा रहिरहनु हो । परमेश्वरको वचनमाथि मनन् हाम्रो आत्माले मात्र नभएर मनले पनि गर्नुपर्छ । हामीले हाम्रो मन र सोचविचारलाई परमेश्वरको वचनले भर्नुपर्छ । पुरानो करारमा परमेश्वरले यहोशूलाई आफूले गर्ने हरेक काममा सफल र समृद्ध हुने रहस्य सिकाउनुभएको छ । त्यो रहस्य यस्तो थियो– यहोशूले आफूलाई हरेक समयमा हरेक स्थानमा परमेश्वरको वचनले भरिपूर्ण राख्नुपर्थ्यो । परमेश्वरको वचनले हाम्रा निम्ति पनि काम गर्नेछ र यसरी हामीले शैतानको सामना गर्न लामो समय खर्च गर्नुपर्दैन ।
यहोशू १:८ (ने.बा.सो. संस्करण)
८. व्यवस्थाको यो पुस्तक तेरो ओठबाट नहटोस्, तर त्यसमाथि तैंले दिनरात ध्यान गर्नू अनि त्यसमा लेखिएका सबै कुरा होशियारीसाथ पालन गर्नू, र तेरा सबै मार्गहरूमा तैंले उन्नति गर्नेछस् र सफलता पाउनेछस् ।
अङ्ग्रेजी भाषाको एक अनुवादले लेखेको छ, “…तिमी आफ्नो जीवनका गतिविधिहरूमा बुद्धिमानी ढङ्गले काम गर्न सक्षम हुनेछौ ।” सफलता कसरी आउँछ ? परमेश्वरको वचनमाथि मनन् गरेर । शैतानमाथिको विजय कसरी प्राप्त गर्न सकिन्छ ? परमेश्वरको वचनमाथि मनन् गरेर ।
जस्तोसुकै परिस्थितिमा पनि परमेश्वरको वचन तपाईंको मुखमा रहिरह्यो र तपाईंले निरन्तर वचनअनुसार काम गरिरहनुभयो भने, सफलता र विजय तपाईंको पछि लाग्नेछन् । समस्या र परिस्थितिहरूका बीचमा रहन छाडिदिनुहोस्, परमेश्वरको वचन बोल्नुहोस् अनि त्यसैमा रहिरहनुहोस् । यसरी शैतानले तपाईंको जीवनमा काम गर्ने मौका पाउनेछैन ।
जबसम्म वचनद्वारा तपाईंको मनको नवीकरण हुँदैन, तबसम्म तपाईंको बाहिरी मनुष्यत्वले मनद्वारा नै तपाईंको भित्री मनुष्यत्व अर्थात् आत्मामाथि शासन गर्नेछ । तपाईंका पाँच इन्द्रियहरूद्वारा शैतानले तपाईंको बाहिरी मनुष्यत्वसम्मको पहुँच प्राप्त गर्नेछ । त्यसैले परमेश्वरको वचनद्वारा तपाईंले आफ्नो मन नयाँ बनाउनुपर्छ ताकि तपाईंको आत्माले मनसँग मिलेर शरीरलाई नियन्त्रण गर्न सकोस् वा शरीरमाथि शासन गर्न सकोस् ।
सधैँभरि कुनै न कुनै किसिमको दुष्ट आत्मा निकाल्न खोजेर मात्र जीवनमा शैतानमाथि विजय पाउन सकिँदैन । बरू त्यो सफलता प्राप्त गर्नका लागि तपाईंले परमेश्वरको वचनद्वारा आफ्नो मनलाई भरिपूर्ण बनाउनुपर्छ । यसले गर्दा तपाईंको प्राण आत्माको अधीनमा स्वतः आउनेछ । अनि तपाईंको आत्माले पवित्र आत्माको निर्देशनमा तपार्इंलाई जीवनको हरेक मार्गमा डोर्याउनेछ– शैतानका जाल तथा पासोबाट पनि तपाईंलाई बचाउनेछ ।
तपाईंले आफ्नो मनले पूर्ण सक्रियताका साथ परमेश्वरको वचनमाथि मनन् गर्नुपर्छ ताकि तपाईंको सोचविचार रुपान्तरण होस् (भजनसंग्रह १:१-३) । जबसम्म तपाईंको सोचविचार रुपान्तरण हुँदैन, तबसम्म तपाईंले शैतानका विचारहरूमाथि ध्यान गरिरहनुहुन्छ अनि अन्ततः उद्धार नपाएका मानिसहरूझैँ व्यवहार गर्न थाल्नुहुन्छ । तर रोमी १२:२ भन्छ– मनको नवीकरणले तपाईंलाई रुपान्तरण गर्छ ! तपाईं रुपान्तरण हुने तरिका मनको नवीकरण हो, आफूबाट दुष्ट आत्मा निकाल्न खोज्नु होइन भनेर बाइबलले सिकाएको छ ।
हामीले ‘शैतानका क्रियाकलाप’ भन्ने गरेका धेरै कुराहरू भूत आत्माहरूले गरेका हुँदैनन् । ती त वास्तवमा विश्वासीका उद्धार नपाएका, नवीकरण नगरिएका मनका प्रतिफलहरू हुन् । विश्वासी भएर पनि संसारकै शैलीमा गरिएका सोचविचार तथा कामका उपज हुन् । उद्धार नगरिएको वा नवीकरण नगरिएको मनले शैतानलाई हाम्रो जीवनमा आउने पहुँच दिन्छ किनकि शैतान मानिसको जीवनमा प्रवेश गर्ने द्वार नै मानिसको मन हो ।
(यो अनुच्छेद शब्द प्रकाशनद्वारा प्रकाशित पुस्तक केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
