प्रभु येशूले शैतानमाथि क्रूसमा विजय प्राप्त गर्नुभएको हुनाले हामी शैतानबाट पराजित, लज्जित र शासित छैनौँ । हामी ख्रीष्टमा रहेर पृथ्वीको यो जीवनमा राजाले झैँ राज्य गर्छौं । हामी ख्रीष्टमा भएका कारणले शैतान हाम्रो पाउमुनि छ । पहिला हामी दास भएर शैतानको सेवा गर्थ्यौं र अहिले हामी जीवनमा प्रभु येशू ख्रीष्टद्वारा राज्य गर्छौं । यो ख्रीष्टमा हामीले पाएको उत्तराधिकारको असीमताको एक भाग हो ।
रोमी ५:१७ (ने.बा.सो. संस्करण)
१७. यदि एउटै मानिसको अपराधले गर्दा त्यस मानिसद्वारा मृत्युले राज्य गर्यो भनेता झन् बढ़ी प्रशस्त अनुग्रह र धार्मिकताको सित्तैँको वरदान पाउनेहरूले एउटै मानिस येशू ख्रीष्टद्वारा जीवनमा राज्य गर्नेछन् ।
के यो कुरा भूत आत्मा तथा दुष्ट आत्माद्वारा शासन गरिएको वा तिनीहरूको प्रभुत्वमा रहेको कुनै मण्डलीको जस्तो लाग्छ र ? अहँ, लाग्दैन ! बाइबलअनुसार, हामीले शैतान र हामीविरुद्धका त्यसका दुष्ट रणनीतिहरूमाथि ‘कहिले’ राज्य गर्नेछौँ ? के हामी सबै स्वर्ग पुगेपछि ? होइन । विश्वासीहरूले यही जीवनमै राजाले झैँ राज्य गर्नेछन् । हामी– जो नयाँ जन्म पाएका छौँ– ख्रीष्टमा नयाँ सृष्टि हौँ । हामी जयवन्त मण्डली हौँ, पराजित होइन । हो, हामी विजयताहरू हौँ ।
प्रभु येशू ख्रीष्टद्वारा हामीले यही जीवनमा राजाले झैँ राज्य गर्छौं । यो नै त्यो बुद्धि/विवेकको एउटा भाग हो, जुन पवित्र आत्माले ख्रीष्टको देहलाई एफिसीको पत्रमा भएको आत्माले भरिएको प्रार्थनाद्वारा दिन खोजिरहनुभएको छ । विगतमा हामीले शैतानका दास भएर सेवा गर्यौँ तर अहिले हामी जीवनको नयाँपनमा हिँडिरहेका छौँ (रोमी ६:४) । अहिले, स्वर्गीय स्थानहरूमा हामी ख्रीष्टसँग बसाइएका हुँदा, उहाँद्वारा नै हामी राजाले झैँ शासन गर्छौं ।
पवित्र आत्माले पावलद्वारा ख्रीष्टको शरीरभरि पुर्याउन खोजिरहनुभएको सन्देश यही हो । हाम्रो समझको आँखा खुलेको परमेश्वर चाहनुहुन्छ ताकि यो जीवनमा ख्रीष्टद्वारा हामी राज्य गर्दछौँ भनेर हामी बुझ्न सक्छौँ ।
हरेक समस्या तथा परिस्थितिहरूमा हामीले शैतानमाथि विजय पाएका छौँ, जसरी यस पृथ्वीमा प्रभु येशूले शैतानमाथि विजय पाउनुभएको थियो भनी हामीले जानेको परमेश्वर चाहनुहुन्छ । विजयी हुन हामीले संघर्ष गर्नु आवश्यक छैन; हामीले केवल वचनमा आफ्नो स्थान लिएर पहिले नै पराजित भइसकेको शत्रुविरुद्ध सशक्त रूपमा खडा हुनु आवश्यक छ ।
ख्रीष्टमा रहेको आफ्नो अधिकार तपाईंले जान्नुभयो भने, रातदिन लगातार शैतानको विरोधमा तपाईं खडा भइरहनुपर्दैन । केवल प्रभु येशूको नाममा शैतानविरुद्ध वचन बोल्नुहोस् र तिनीहरू सुइँकुच्चा ठोक्नेछन् । तपाईंले तिनीहरूविरुद्ध लडाइँ गर्नुपर्दैन; तिनीहरू पराजित र च्युत गरिएका छन् । तिनीहरूविरुद्ध वचनमा खडा हुनुभयो भने, तपाईं प्रभु येशूको विजयमा खडा हुनुभएको हुनेछ ।
म तपाईंसँग इमान्दार हुन्छु । मलाई थाहा छैन, मभित्रको धार्मिक दृढता उत्तेजित भएको हो कि वा सामान्य रूपमा मलाई झोँक चलेको हो, कहिलेकहीँ जब कुनै प्रचारकले शैतानसँग डराउनुपर्छ भनेर विश्वासीहरूलाई प्रचार गरिरहेको सुन्छु, तब मभित्र केही उम्लेर आउँछ । उनीहरू यसो भन्दै प्रचार गरिरहेका हुन्छन्, “तपाईंहरू सावधान रहनु उत्तम हुन्छ ! अन्यथा तपाईंको कुरा शैतानले सुन्नसक्छ ।” अथवा “तपाईंहरू होसियार रहनुहोला । अन्यथा शैतानले तपाईंलाई रोगीबिमारी बनाउन प्रयास गर्नेछ ।”
मसँग आफ्नो व्यक्तिगत जीवन र मेरो परिवारमाथिको अधिकार छ । यदि शैतान रोगबिमार, गरिबी, अभाव तथा उत्पीडन लिएर मेरो घरको ढोका ढक्ढक्याउन आयो भने, म त्यसलाई भन्नेछु, “मेरो घरमा नआइज । तेरा कवाडी कुराहरू लिएर अन्यत्रै जा । म तेरो कुनै कुरा पनि स्वीकार गर्दिनँ ।”
तर तपाईंको जीवनमा म शैतानमाथि अधिकार गर्नसक्दिनँ । मसँग तपाईंको जीवनमाथिको अधिकार छैन । अन्ततः तपाईंले शैतानविरुद्ध आफैँ खडा हुन सिक्नुपर्छ । निश्चय नै, यदि तपाईं शिशु-विश्वासी हुनुहुन्छ भने, म आफ्नो विश्वासद्वारा तपाईंको जीवनमा काम गर्न सक्छु । यद्यपि, कालान्तरमा परमेश्वरको तपाईंमाथि यही अपेक्षा हुन्छ, “शैतानमाथि तपाईंले पाउनुभएको अधिकार तपाईं स्वयम् प्रयोग गर्नुहोस् ।”
यदि तपाईंले पहिले नै रोगबिमार वा शैतानले तपाईंको जीवनमा ल्याउन खोज्ने कुराहरू स्वीकार गर्नुभएको छ भने, तपाईंले ठूलो गडबडी गर्नुभयो । यस्तो अवस्थामा तपाईं आफैँले शैतानविरुद्ध केही गर्नुपर्ने हुन्छ । तर परमेश्वरलाई धन्यवाद भएको होस्, प्रभु येशूको नाममा केही गर्न सकिन्छ ।
यदि तपाईंले अरू कसैलाई [प्रार्थनाको] अनुमति दिनुभयो भने, उनीहरूले विश्वासमा तपाईंका निम्ति प्रार्थना गर्न सक्छन् । तर, वास्तवमा, आफ्नो जीवनमा शैतानमाथि अधिकार गर्ने विषयमा तपाईं आफैँले केही गर्नै पर्छ । ख्रीष्टमा रहेको आफ्नो सही स्थानमा पुग्ने एउटा तरिका यही हो । शैतान, रोगबिमार वा शैतानले ल्याउन प्रयास गर्ने जुनसुकै कुराविरुद्ध अधिकार प्रयोग गर्नुहोस् । प्रभु येशूको नाममा आफ्ना निम्ति ती कुराहरूविरुद्ध खडा हुनुहोस् । शैतानले ल्याउने कुराहरूलाई स्वीकार गरेर विश्वासीहरू ठूलो गल्ती गर्छन् ।
आफूभित्र हुनुहुनेलाई तपाईंले चिन्नुभएन भने र उहाँमा तपाईंसँग भएको अधिकारलाई देख्नुभएन भने, तपाईं पराजित हुनुहुनेछ । आफूभित्र महान् व्यक्ति हुनुहुन्छ भन्ने सत्यतालाई नजान्दा तपाईंले शैतानलाई मौकाको फाइदा उठाउन दिनुहुन्छ ।
अन्धकारको राज्यमै रहिरहेका, उद्धार नपाएका मानिसहरूलाई अधीनमा राख्नु शैतानका निम्ति एउटा कुरा हो । तिनीहरू शैतानको अधिकारमुनि छन् । तर शैतान र त्यसका दूतगणहरूले ती असङ्ख्य ख्रीष्टीयनहरूलाई पनि आफ्नो प्रभुत्वमा राखिरहेका छन्, जसलाई आफ्नो अधिकारको विषयमा थाहा छैन वा जो आफ्नो अधिकार प्रयोग गर्दैनन् ।
यसकारण विश्वासीहरू प्रार्थनाको यो केन्द्रमा एकताबद्ध हुनु जरुरी छ कि अन्धकारका ती सबै आत्मिक सामर्थ्यहरूलाई प्रभु येशूले पराजित गरिसक्नुभएको छ । विश्वासीहरूले प्रार्थना गर्दा विजयको आफ्नो स्थानबाट प्रार्थना गर्न आवश्यक छ किनभने विश्वासीहरू स्वर्गीय स्थानहरूमा ख्रीष्टसँगै बसाइएका छन् र त्यहाँबाट तलतिर पराजित शत्रुलाई हेरिरहेका छन् ।
तपाईं जब प्रार्थना गर्नुहुन्छ, सबै प्रधानता तथा शक्तिहरूभन्दा धेरै माथि ख्रीष्टसँगै रहेको तपाईंको स्थानबाट प्रार्थना गर्नुहोस् । प्रभु येशूको विजय तपाईंको विजय हो । प्रभु येशूले गर्नुभएको कामले गर्दा तपाईं शैतानको प्रभुत्वबाट मुक्त हुनुहुन्छ ।
धेरैजसो समय ख्रीष्टीयनहरूले ख्रीष्टमा आफूसँग भएको स्थान र प्रभुत्वलाई आत्मसात् गर्न असफल हुन्छन् । उनीहरू संघर्ष गर्छन्; आफूले सकेजति उत्कृष्ट गर्न खोज्छन् । विजेताका रूपमा ख्रीष्टमा आफूले पाएको उत्तराधिकार लिन छाडेर उनीहरू शैतानका कामको बढाइँ गर्छन् । यसले शैतानलाई ती ख्रीष्टीयनहरूको जीवनमाथि पहुँच दिन्छ ।
तपाईं कुनै पनि कुराको नकारात्मक पाटोमा रहन सक्नुहुन्छ । तपाईं जहाँ बस्नुहुन्छ, त्यस्तै नै बन्नुहुनेछ । तपाईंले के सोचिरहनुभएको छ र तपाईं कुन स्थानमा हुनुहुन्छ भन्ने कुराहरूले तपाईंको विश्वासलाई जनाउँछन् । तपाईं जे विश्वास गर्नुहुन्छ, तपाईंको बोलीवचन त्यस्तै हुन्छ । अन्ततः तपाईं जे विश्वास गर्नुहुन्छ, जे बोलिरहनुहुन्छ, तपाईं त्यही बन्नुहुन्छ ।
यो भूत आत्मा र शैतानका गतिविधिको क्षेत्रमा पनि लागू हुन्छ । यदि तपाईंले शैतानको विचारमाथि चिन्तन गर्नुभयो भने, तपाईं निराश बन्नुहुनेछ, उत्पीडित हुनुहुनेछ र तपाईं गलत मार्गमा पुग्नुहुनेछ । अथवा तपाईं परमेश्वरको वचनमा चिन्तन गर्न सक्नुहुन्छ । यसकारण तपाईंको विचार ज्योतिर्मय हुनेछ । हो, प्रकाशमान हुनेछ ।
तपाईं शैतान कति सामर्थी छ भन्दै त्यसको चर्चा गर्दै हिँड्न सक्नुहुन्छ वा तपाईं सकारात्मक पाटोमा हिँडेर परमेश्वरको विवेक देख्नका लागि आफ्नो समझको आँखा ज्योतिर्मय बनाउन सक्नुहुन्छ । यसो गर्दा तपाईं वचनको पक्षमा हुनुहुनेछ; विजयको पक्षमा हुनुहुनेछ । यो तपाईंको स्थान नै ख्रीष्टमा तपाईंको विजयका कारण हो ।
प्रभु येशूले शैतानलाई पराजित गर्नुभएको सत्य मलाई थाहा छ । म यही कुरामा चिन्तन गर्छु र यही घोषणा गर्छु । अनि जो महान् हुनुहुन्छ, उहाँले मलाई उच्चमा राख्नुहुनेछ र जयवन्त तथा सफल तुल्याउनु हुनेछ किनभने मैले परमेश्वर र उहाँको वचनको सामर्थ्यलाई स्थान दिइरहेको छु, शैतानलाई होइन ।
धेरै ख्रीष्टीयनहरू पराजित भएका छन् किनभने उनीहरू “आफूमा हुनुहुनेभन्दा संसारमा हुनेलाई महान्” देख्छन् । उनीहरू यसैलाई विश्वास गर्छन् र अन्ततः त्यही स्वीकार गर्न थाल्छन् ।
हो, नकारात्मक स्वीकार भएकै कारण धेरै मानिसहरू यो जीवनमा पराजित भएका हुन् । उनीहरू जहिले पनि कुनै कुराको नकारात्मक पाटोमा कुरा गरिरहेका हुन्छन् । यसले उनीहरूको जीवनमा शैतानका निम्ति ढोका खोल्छ ।
उनीहरू जहिले पनि आफूसँग नभएको वा आफू हुन नसकेको कुराको विषयमा चर्चा गरिरहन्छन् । आफ्ना अयोग्यता, कमजोरी तथा अभावलाई ठूलो देख्छन् । उनीहरू यसलाई स्वीकार गर्छन् र आफ्नो जीवनमा सोही स्वीकारअनुसार ओह्रालो लाग्छन् ।
यदि तपाईंले परमेश्वरको सामर्थ्यभन्दा शैतानको शक्ति बलवान् छ भनेर विश्वास अनि स्वीकार गर्नुभयो भने, शैतानले तपाईंलाई पराजित गर्नेछ । तर ख्रीष्टमा रगतको मोल तिरेर खरिद गरिएको आफ्नो अधिकारमा तपाईं खडा हुनुभयो र त्यसैलाई आफ्नो स्वीकारोक्ति बनाउनुभयो भने, तपाईं आफ्नो स्वीकार तथा उत्तराधिकारको तहमा खडा हुनुहुनेछ ।
प्रत्येक परीक्षा तथा परिस्थितिमा आफ्ना शत्रुका आक्रमणविरुद्ध परमेश्वरको वचनमा खडा हुनुभयो भने, तपाईंमा कति महान् परिवर्तन होला ! ख्रीष्टमा हर दिन जीवनमा सकारात्मक स्वीकार गरेर अघि बढ्नुभयो र आफ्नो जीवनमा शैतानलाई कुनै मौका दिनुभएन भने, तपाईंमा कति महान् परिवर्तन होला !
तब तपाईं आफ्नो स्वीकारको तहमा उठ्नुहुनेछ– तपाईंले ख्रीष्टमा आफ्नो सही स्थान लिनुहुनेछ र ख्रीष्टले अघि नै तपाईंका निम्ति राखिदिनुभएको कुरालाई हात पार्नुहुनेछ । शैतानका सबै सामर्थ्यमाथि ख्रीष्ट येशूको जयवन्त मण्डलीका रूपमा तपाईंले आफ्नो स्थान लिनुहुनेछ ।
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
