आजकल केही मानिसहरू लडाकु वा युद्धरत मण्डलीको विषयमा कुरा गरिरहेका छन् । तिनीहरूमध्ये कोही यस्ता मानिसहरू छन्, जो प्रभु येशू ख्रीष्टको मण्डली सफल हुनका लागि शैतानविरुद्ध लडाइँ गरिरहनुपर्ने बताउँछन् ।
यद्यपि, म लडाकु मण्डली होइन, जयवन्त मण्डलीको कुरा गर्छु किनभने यो पवित्रशास्त्रसम्मत छ । शैतानविरुद्धको प्रभु येशूको विजय प्रत्येक विश्वासीको विजय हो र यदि विश्वासीहरू ख्रीष्टमा आफूले पाएको उत्तराधिकारको प्रकाशमा हिँड्छन् भने, हरेक विश्वासीले त्यो विजयको उत्सव मनाउनेछ ।
निरन्तर युद्धरत मण्डलीको विषयमा कुरा गरिरहने मानिसहरू ती हुन्, जो यसो भन्दै सदैव शैतानविरुद्ध लड्न प्रयास गरिरहेका हुन्छन् : “हामी शैतानविरुद्ध युद्ध गरिरहेका छौँ । यो युद्ध निकै भयानक हुनेछ ! यो एक भीषण एवम् खतरनाक युद्ध हुनेछ, जसमा हामीले जित्न पनि सक्छौँ हार्न पनि सक्छौँ !”
हरसमय त्यस्ता कुरा गर्ने मानिसहरूको समझको आँखा खुल्नु जरुरी छ ताकि प्रभु येशू ख्रीष्टले अघि नै त्यो युद्ध जितिसक्नुभएको छ भन्ने सत्यता उनीहरूले देख्न सकून् । अब त उनीहरू केवल त्यो विजयमा खडा हुनु आवश्यक छ ।
जब तपाईंको समझको आँखा खुल्नेछ र तपाईंले ख्रीष्टमा रहेको आफ्नो विजयको स्थान देख्नुहुनेछ, तब शैतान र त्यसका दूतगणले तपाईंको जीवनमा आक्रमण गर्दा त्यसको प्रतिवाद कसरी गर्ने भनी तपाईंलाई थाहा हुन्छ । ख्रीष्टमा रहेको दुष्ट आत्मामाथि तपाईंको अधिकारका कारणले परमेश्वरको वचनको साथमा तपाईं उभिनुहुनेछ र तिनीहरूलाई आ-आफ्नो स्थानमा राखिदिनुहुनेछ ।
ख्रीष्टको शरीर जयवन्त छ । परमेश्वरलाई धन्यवाद भएको होस्, ख्रीष्टमा रहेको हाम्रो उत्तराधिकारका कारण हामी पाप, रोगबिमार, गरिबी र खराब आदतमाथि विजय हुनसक्छौँ । हामी शैतान, दुष्ट आत्मा र हामीलाई बाँध्न खोज्ने शत्रुका कुनै पनि कुरामाथि विजय हुनसक्छौँ किनभने प्रभु येशूले हाम्रा लागि पहिले नै तिनीहरूलाई पराजित गरिसक्नुभएको छ ।
हाम्रो छुट्काराका लागि मात्र प्रभु येशूले आफैँलाई त्यस्तो विकराल कष्टमा पार्नुभएको थियो । हो, हामीलाई शत्रुको हातबाट मुक्त गर्नका लागि नै उहाँले आफैँलाई कष्टमा पार्नुभयो । परमेश्वरलाई धन्यवाद भएको होस्, उहाँले मण्डलीलाई अर्थात् हामी विश्वासीहरूलाई छुटाउनका लागि यी सबै कुराहरू गर्नुभयो, जो ख्रीष्टमा रहेको आफ्नो उत्तराधिकारमा सहभागी हुन्छन् र जीवनका दैनिक गतिविधिमा उल्लास तथा विजयद्वारा शैतानमाथि शासन गर्छन् । प्रभु येशूले जे गर्नुभयो, हाम्रा लागि गर्नुभयो र शैतानमाथि प्रभु येशूले आर्जन गर्नुभएको विजय हाम्रो विजय हो ।
ख्रीष्टमा आफूले पाएको आशिष्लाई विश्वासद्वारा आफ्नो बनाउनु वा स्थापित गर्नुबाहेक हामीलाई अरू कुनै कुराको आवश्यकता पर्दैन । पहिले नै आफ्नो भइसकेको कुराका निम्ति विश्वास गर्न हामीले सङ्घर्ष गरिरहनु पर्दैन । तर हाम्रो के हो, त्यो हामीले जान्नु आवश्यक छ अन्यथा ख्रीष्टमा हामी आफ्नो आसनग्रहण गर्न सक्दैनौँ र आफूले पाएको अशिष्को लाभ उठाउन सक्दैनौँ ।
परमेश्वरको छुट्काराको योजना जहाँ जहाँ उजागर गरिएको [प्रचार गरिएको] छ, त्यहाँ मानिसहरू बचाइएका छन् र उनीहरू आफ्ना परिस्थितिहरू तथा शैतानका सामर्थ्यमाथि हाबी भएका छन् ।
ख्रीष्टको देहले कहिल्यै पनि कायर भएर आफूलाई शैतानको सामर्थ्यमा वा त्यसको प्रभुत्वमा समर्पित गर्नु पर्दैन । हामी साहसका साथ प्रभु येशूको नाममा खडा हुनुपर्छ र आफ्नो उत्तराधिकारमा सर्वोच्च परमेश्वरको सन्तानको हैसियतले जयवन्त मण्डली भई खडा हुनुपर्छ !
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
