मानिसहरू हतोत्साहित हुने एउटा कारण उनीहरूको गलत सोचाइ हो भनी के तपाईंले कहिल्यै ख्याल गर्नुभएको छ ? गलत सोचविचारले दुष्ट आत्मालाई उनीहरूको प्राणसम्म आउने बाटो दिन्छ । उदाहरणका लागि, विश्वासीहरू विगतमा के भयो, मानिसहरूले उनीहरूलाई कस्तो व्यवहार गरे भन्ने कुरा मनमा खेलाइरहन्छन् । हो, नयाँ जन्म पाएका, आत्माले भरिएका विश्वासीहरू पनि हताश हुन सक्छन् । निश्चय नै, विभिन्न दबाबहरू सिर्जना गरेर शैतानले विश्वासीहरूलाई सताउन, हतोत्साहित गर्न खोज्छ ।
तर गलत प्रकारका विचार मनमा खेलाउनाले विश्वासीहरू सजिलै हतोत्साहित् हुन सक्छन् । यसले गर्दा शैतानले काम गर्ने मौका पाउँछ; उनीहरूको मनमा आएर खेल्ने मौका पाउँछ । मानिसलाई गलत सल्लाह, सोच र भावनाद्वारा गलत क्रियाकलापतर्फ अगुवाइ गर्न शैतानले ५ इन्द्रियहरूका क्षेत्रहरूमा काम गर्छ ।
तर बाइबल भन्छ, “र दियाबलस [शैतान] लाई मौका नदेओ” (एफिसी ४:२७) । हामीले आफ्नो सोचविचारमा शैतानलाई प्रवेश गर्ने मौका दिनुहुँदैन । गलत सोचविचार गर्नु शैतानलाई आफ्नो जीवनमा मन, विचार र भावनाद्वारा प्रवेश गर्ने मौका दिनु हो । आत्मग्लानी, पछुतो, चिन्ता, पिर तथा दोषी भावनाजस्ता कुरा शैतानका विचार हुन् अनि शैतान विश्वासीहरूलाई जीवनका नकारात्मक पक्षका बारेमा सोच्न अभ्यस्त गराउँछ ।
विश्वासीहरूले आत्मग्लानी तथा पछुतोको भावना मनमा राख्दाखेरी शैतानले उनीहरूबाट फाइदा उठाउँछ र उनीहरूलाई आफ्ना झूट कुराहरूको दासत्वमा राख्छ । गलत विचारको दासत्वले विश्वासीहरूलाई ख्रीष्टमा आफूले पाएको स्थानमा खडा भएर शैतानमाथि आफूले प्राप्त गरेको अधिकार प्रयोग गर्न अवरोध सिर्जना गर्छ । वास्तवमा, विश्वासीहरू शैतान र दोष लगाउने त्यसका हतियारहरूमाथि विजयी छन् किनभने ख्रीष्ट येशूले शैतान तथा त्यसको हतियारहरू सबैमाथि क्रूसमा विजय हाँसिल गर्नुभएको छ (कलस्सी २:१५) । तर विश्वासीहरू त्यो अधिकारमा खडा भएनन् भने, शैतानले तिनीहरूमाथि आफ्नो अधिपत्य लागू गर्नेछ ।
लगातार गलत सोचाइ मनमा खेलाउने विश्वासीहरू एक दिन यस्तो अवस्थामा पुग्छन्, जहाँ उनीहरू आत्महत्या गर्न चाहन्छन् । हो, विश्वासीहरू त्यो अवस्थामा पुग्छन् ! तब असल विचार राख्ने केही विश्वासीहरू यसो भन्छन्, “आउनुहोस्, यिनीहरूबाट दुष्ट आत्मा निकालौँ !” वास्तवमा, यो कुनै दुष्ट आत्माको समस्या होइन । यो त गलत सोचाइको परिणाम हो ।
निश्चय नै, शैतानले विश्वासीहरूलाई खराब काम गर्न लगाउने प्रयास गर्छ । यदि खराब सोचविचार राख्ने विश्वासीहरूले परमेश्वरको वचनद्वारा आफ्नो मनको नवीकरण गरे भने, सर्वप्रथम उनीहरू निराशाको समस्यामा पर्नेछैनन् किनभने मानिसको जीवनमा प्रवेश गर्न शैतानले प्रयोग गर्ने मनको ढोका बन्द गरिएको हुन्छ ।
वास्तवमा, विश्वासीहरूले हरेक क्षण आफैँलाई “परमेश्वरको वचनले के भन्छ ?” भनेर सोध्न अभ्यस्त गराए भने, उनीहरू शैतानको निराशा, आत्मग्लानी, पछुतो, दोषी-भावना जस्ता दासत्वका सिकार हुनेछैनन् । उनीहरू ख्रीष्टमा जयवन्त हुनेछन्– शैतानका धूर्तता तथा रणनीतिहरूमाथि विजयी बन्नेछन् ।
“मेरो यो परिस्थितिको बारेमा वचनले के भन्छ ?” भनेर विश्वासीहरूले आफैँलाई प्रश्न गरे भने, धेरै समस्याहरूको समाधान स्वतः निस्किन्छ चाहे ती शैतानसँग सम्बन्धित समस्याहरू नै किन नहुन् । विश्वासीहरूले शैतानका कुराहरूमाथि होइन परमेश्वरको वचनमाथि चिन्तन गर्न आफ्नो मनलाई तालिम दिनुपर्छ । नवीकरण गरिएको मनले परमेश्वरको वचनका कुराहरू सोच्छ । यसरी तपाईं शैतानविरुद्ध सशक्त खडा हुन सक्नुहुन्छ । नवीकरण नगरिएको मनले शैतानका कुरा सोच्छ । यसैकारण तपाईं कमजोर बन्नुहुन्छ र शङ्का, चिन्ता, डर, आत्मग्लानी, पछुतो, दोषी भावना आदिजस्ता कुराहरूलाई आफ्नो जीवनमा आउने बाटो दिनुहुन्छ ।
विश्वासीहरूले शैतानका लागि ढोका खोल्नसक्ने अर्को क्षेत्र भनेको अक्षमाशीलता वा क्षमा नदिने भावनालाई आफ्नो हृदयमा पालेर राख्नु हो । विश्वासीहरू आफ्ना विगतका गल्ती तथा अरूले आफूविरुद्ध गरेका गल्ती तथा विभिन्न क्रियाकलापहरूको तलाउबाट बाहिर निस्कनु आवश्यक छ किनभने प्राणको शत्रु शैतानले त्यही भावनालाई उनीहरूभित्र प्रवेश गर्ने बाटो बनाउनेछ ।
यशैया ४३:२५
२५. “म उही हुँ, जसले तेरा अपराधहरू मेरो आफ्नै खातिर मेटिदिन्छ, र तेरा पापहरूलाई सम्झँदैन ।
आफ्ना विगतका पाप, असफलता तथा गल्तीहरूका बारेमा लगातार सोच्नाले शैतानलाई तपाईंको सोचाइ तथा भावनामाथिको अधिकार दिन्छ । यदि तपाईंले गल्ती गर्नुभएको छ र त्यसका लागि प्रभु येशू ख्रीष्टको नाउँमा परमेश्वरसँग क्षमा माग्नुभएको छ भने, उहाँले कहिल्यै तपाईंका ती गलत कार्यहरू सम्झनुहुन्न (१ यूहन्ना १:९) । यदि परमेश्वरले नै सम्झनुहुन्न भने, तपाईंले चाहिँ किन सम्झिरहने त ?
परमेश्वरको प्रेम र क्षमाले आफ्नो मनलाई नवीकरण गर्नुहोस्, अन्यथा शैतानले तपाईंको मनोदशाको लाभ उठाउनेछ । वास्तवमा, शैतानले तपाईंलाई नकारात्मक सोच्ने बनाउन सक्यो भने, त्यसले तपाईंको मन वा प्राणमा अलिअलि गर्दै आफ्नो पकड विस्तार गर्नेछ । त्यसैकारण तपाईंले शैतानलाई आफ्नो जीवनमा अलिकति पनि ठाउँ दिनुहुँदैन ! जब शैतान नकारात्मक सोच लिएर तपाईंलाई परीक्षामा पार्न आउँछ, उसलाई परमेश्वरको वचनले के भन्छ, त्यो भनेर फिर्ता पठाइदिनुहोस् । तपाईं हतोत्साही वा अन्य कुनै प्रकारका नकारात्मक विचारको सिकार हुनुपर्दैन ।
हो, आफ्नो मनलाई परमेश्वरको वचनले नयाँ बनाउनुहोस् ! विगतमा फर्किएर आफूले गरेका गल्तीहरूलाई कोट्टयाएर नहेर्नुहोस् । पछाडिका कुराहरू बिर्सेर अगाडिका कुराहरूतिर जोडसँग लम्कँदै ख्रीष्ट येशूको स्वर्गीय बोलावटमा अघि बढ भनेर वचनले सिकाएको छ (फिलिप्पी ३:१३,१४) ।
शैतानले सधैँ विगतका पापहरूका तस्वीर तपाईंको मनमा ल्याउने प्रयास गर्छ, विगतका कमीकमजोरीका तस्वीरहरू मनमा ल्याउने प्रयास गर्छ । तर यदि तपाईंले परमेश्वरको प्रेम र क्षमाद्वारा आफ्नो मनको नवीकरण गर्नुभएको छ भने, तपाईं त्यति बेला शैतानको उपहास गर्दै यसो भन्न सक्नुहुन्छ, “ए दुष्ट शैतान, मैले क्षमा पाएको छु भनेर परमेश्वरको वचनले बताएको छ । यशैया ४३:२५ अनुसार परमेश्वरले मेरा अपराधहरू मेटिदिनुभएको छ ! तैँले विगतका असफलताहरूका तस्वीर मलाई देखाउन खोजिरहेको छस् तर ती त सबै नष्ट भइसकेका छन् !” अनि त्यसपछि तपाईं विजयमा खुशी मनाउँदै आनन्दसाथ हिँड्न सक्नुहुन्छ ।
यदि तपाईंले परमेश्वरको वचनद्वारा शैतानलाई त्यसको आफ्नो ठाउँमा राखिदिनुभयो भने, तपाईं वचन पालन गर्ने व्यक्ति ठहरिनुहुनेछ (याकूब १:२२) ! बाइबलअनुसार त्यो व्यक्ति आशिष्मय हुन्छ, जसले परमेश्वरको वचन पालना गर्छ (याकूब १:२५) । तपाईंलाई परमेश्वरले बनाउनुभयो र आफ्नै स्वरूपमा सुव्यवस्थित गर्नुभयो । त्यसकारण शैतानका लागि ढोका बन्द गर्ने विषयमा उहाँले दिनुभएको निर्देशनलाई निसर्त पालन गर्नुहोस् अनि तपाईं जीवनको हरेक क्षेत्रमा सफल बन्नुहुनेछ ।
(यो अनुच्छेद शब्द प्रकाशनद्वारा प्रकाशित केनथ ई. हेगनको पुस्तक ‘जयवन्त मण्डली’ बाट साभार गरिएको हो । यस विषयमा थप ज्ञानका लागि उक्त पुस्तक अध्ययन गर्नुहोस् ।)
